19.09.2026 | 13:33
ԱԺ պատվիրակությունը սեպտեմբերի 27-ից հոկտեմբերի 2-ը կմեկնի Ստրասբուրգ
Շահութահարկ վճարողներին 2-րդ եռամսյակի կանխավճարների կատարումից ազատելու նախագիծն ընդունվեց առաջին ընթերցմամբ. ՏԵՍԱՆՅՈՒԹ
Քաղաքականություն
15.06.2020 | 17:53
Ազգային ժողովն այսօր արտահերթ նիստում առաջին ընթերցմամբ ընդունեց Կառավարության կողմից առաջարկված Հարկային օրենսգրքում փոփոխություններ կատարելու նախագիծը։ Դրանով առաջարկվում է վերանայել շահութահարկի կանխավճարների համակարգը։ Օրինագիծն ԱԺ նիստում ներկայացրեց ՀՀ ֆինանսների փոխնախարար Արման Պողոսյանը:
Ներկայում ՀՀ հարկային օրենսգրքով սահմանված է շահութահարկի եռամսյակային կանխավճարների գումարների հաշվարկման երկու եղանակ. հիմնական եղանակ, որի շրջանակում կանխավճարի գումարը հաշվարկվում է նախորդ տարվա արդյունքներով հաշվարկված շահութահարկի գումարի 20 տոկոսի չափով, և այլընտրանքային եղանակ, որի շրջանակում կանխավճարի գումարը հաշվարկվում է յուրաքանչյուր եռամսյակին նախորդ եռամսյակի ընթացքում հարկ վճարողի իրացման շրջանառության 2 տոկոսի չափով:
Միաժամանակ, գործող օրենսդրության համաձայն, այլընտրանքային եղանակով շահութահարկի կանխավճարները հաշվարկելու համար անհրաժեշտ է, որպեսզի հարկ վճարողը, մինչև յուրաքանչյուր տարվա մարտի 20-ը ներառյալ, հարկային մարմին ներկայացնի համապատասխան հայտարարություն:
Նախագծով առաջարկվում է ամբողջությամբ վերանայել շահութահարկի կանխավճարների համակարգը՝ սահմանելով, որ յուրաքանչյուր եռամսյակի շահութահարկի կանխավճարը կատարվում է նախորդ տարվա արդյունքներով հաշվարկված շահութահարկի գումարի 20 տոկոսի և նախորդ եռամսյակի իրացման շրջանառության 2 տոկոսի գումարներից նվազագույնի չափով` զուգահեռաբար վերացնելով նաև կանխավճարի որևէ եղանակի ընտրության համար հայտարարություն ներկայացնելու պահանջը: Առաջարկվում է նաև սահմանել, որ 2020 թվականի երկրորդ եռամսյակի համար տնտեսավարող սուբյեկտները շահութահարկի կանխավճարներ առհասարակ չեն կատարում:
Նախագիծը քվեարկությամբ ստացավ 94 կողմ ձայն: Նախագիծը կքննարկվի հրատապության ռեժիմով՝ առաջին ընթերցմամբ ընդունումից հետո 24 ժամվա ընթացքում:
Մանրամասները՝ տեսանյութում։
