08.11.2024 | 20:43
Կապանում ՍՊԸ-ի տնօրենին ծանր մարմնական վնասվածքներ հասցնելու վարույթով կալանավորվել է երկու անձ. ՔԿ
Ռուս-չեխական դիվանագիտական կոնֆլիկտ․ երկրները միմյանց դիվանագետներին փոխադարձաբար «անցանկալի անձ» են հայտարարել
Քաղաքականություն
15.06.2020 | 17:22
ՌԴ-ն Չեխիայի դեսպանության երկու աշխատակիցների persona non grata՝ «անցանկալի անձ» է հայտարարել։ Նրանք պետք է մինչև հունիսի 17-ն ընտանիքների հետ հեռանան Մոսկվայից։ Այս մասին ասվում է ՌԴ ԱԳՆ հաղորդագրությունում։
Որոշման մասին հայտնել են ՌԴ ԱԳՆ հրավիրված Չեխիայի դեսպան Վիտեզսլավ Պիվոնկային։
Նշվում է, որ չեխ դիվանագետներին «անցանկալի անձ» հայտարարելը պատասխան է Պրահայի ոչ բարեկամական գործողություններին, որն «աբսուրդ և անապացույց մեղադրանքներից» հետո արտաքսել է Չեխիայում Ռուսաստանի դեսպանատան երկու աշխատակիցների։ Ռուսական ԱԳՆ-ում ընդգծել են նաև, որ այս քայլին գնացել են փոխադարձության սկզբունքից ելնելով և Դիվանագիտական հարաբերությունների մասին 1961թ․ Վիեննայի կոնվենցիայի հիման վրա։
Հունիսի 5-ին էլ Չեխիան «անցանկալի անձ» էր հայտարարել Պրահայում «Ռոսսոտրուդնիչեստվա»-ի ներկայացուցիչ Անդրեյ Կոնչակովին և նրա տեղակալ Իգոր Ռիբակովին։
Չեխական ռադիոյի փոխանցմամբ՝ նրանցից մեկն անանուն «մտացածին հաղորդագրություն է ուղարկել Չեխիայի Անվտանգության և տեղեկատվության ծառայություն այն մասին, որ իր գործընկերը թունավոր նյութ՝ ռիցին է բերել Չեխիա»՝ երեք չեխ քաղաքական գործիչների թունավորելու համար, որոնք մասնակցել են խորհրդային մարշալ Իվան Կոնևի հուշարձանը հանելուն և ՌԴ դեսպանատանը հարակից հրապարակը Բորիս Նեմցովի անունով կոչելուն։
Չեխիայի ԱԳ նախարար Տոմաշ Պետրշիչեկը հայտարարել է, որ Պրահան փորձել է խնդիրը լուծել դիվանագիտական ճանապարկով, սակայն հարցն անաղմուկ հարթելու՝ ռուսական կողմի ցանկության բացակայության պայմաններում հարկադրված է եղել ռուս դիվանագետներին արտաքսել երկրից։
