Մոսկվայում վաղվանից կչեղարկվի անցագրային և ինքնամեկուսացման ռեժիմը

Մոսկվայի քաղաքապետ Սերգեյ Սոբյանինը հայտնել է, որ հունիսի 9-ից ՌԴ մայրաքաղաքում չեղարկվում է անցագրային և ինքնամեկուսացման ռեժիմը։ Վաղվանից մայրաքաղաքի բնակիչները կարող են ազատորեն դուրս գալ փողոց, այցելել հանրային վայրեր, գրում է ՌԻԱ Նովոստին։

Քաղաքապետը նշել է, որ ինքնամեկուսացման ռեժիմը թույլ տվեց խուսափել կորոնավիրուսով հիվանդացության թվի կտրուկ աճից։ Սոբյանինը նաև տեղեկացրել է, որ քաղաքում համաճարակն արդեն մի քանի շաբաթ է՝ անկում է գրանցում։ Մասնավորապես, նվազում է հիվանդների թիվը, իսկ հիվադանոցից դուրս գրվածների թիվը գերազանցում է հոսպիտալացվողների թվին։

Նշենք, որ հունիսի 9-ից Մոսկվայում կրկին կսկսեն գործել գեղեցկության սրահները, ֆոտոսրահները, անասնաբուժական կլինիկաները, աշխատանքի տեղավորման գործակալությունները, տարբեր հասարակական կազմակերպություններ, թատրոններում կվերսկսվեն փորձերը։ Այցելության համար բաց կլինեն նաև գերեզմանատները։

Եվս մեկ շաբաթ անց՝ հունիսի 16-ից, կբացվեն գրադարանները, թանգարանները, ցուցասրահներն ու կենդանաբանական այգիները։ Աշխատանքը կվերսկսեն նաև վարձույթի ծառայությունները, գովազդային, խորհրդատվական և այլ գործակալություները։

Սահմանափակումների վերացման հաջորդ փուլն ուժի մեջ կմտնի հունիսի 23-ից։ Այդ օրվանից Մոսկվայի բնակիչները հնարավորություն կունենան հաճախել մարզասրահներ, լողավազաններ, բաղնիք, շոգեբաղնիք, ռեստորաններ, սրճարաններ, բարեր և հանրային սննդի այլ օբյեկտներ։

Միաժամանակ, նշվում է, որ սահմանափակումների չեղարկման ժամկետները կարող են փոխվել, եթե կորոնավիրուսի տարածման տեմպերը փոխվեն։