Ներդրումային միջավայրի բարելավումը հետաձգվում է․ բավարար օպերատիվություն չեք ցուցաբերել․ նախարարը համաձայնեց դիտարկման հետ. ՏԵՍԱՆՅՈՒԹ

Ներդրումների և արտահանման խթանման ծրագրում շուրջ 81 տոկոս թերակատարում է եղել։ Այդ ի՞նչ ծրագիր է, որը ամբողջությամբ ձախողել եք։ Այս հարցն այսօր ԱԺ տնտեսական ու ֆինանսավարկային և բյուջետային հարցերի մշտական հանձնաժողովների համատեղ նիստում Պետական բյուջեի 2019 թվականի կատարողականի քննարկման ժամանակ ՀՀ էկոնոմիկայի նախարար Տիգրան Խաչատրյանին ուղղեց «Լուսավոր Հայաստան» խմբակցության պատգամավոր Անի Սամսոնյանը։

Ի պատասխան՝ նախարարը նշեց, որ ոչինչ չի ձախողվել․ «2019 թվականի պետական բյուջեով նախատեսված էր օգտագործել Համաշխարհային բանկի մեկ վարկային ծրագիր, որը 2 բաղադրիչով որոշ իրականացում պետք է ունենար տարվա ընթացքում։ Նոյեմբերին է եղել վերջնական պայմանավորվածությունը այդ փաթեթի, կատարումն ընկել է 2020 թվական։ Ոչ թե ձախողվել են, այլ չենք հասցրել իրականացնել 2019 թվականի դեկտեմբերին՝ կազմակերպական նկատառումներով, 2020 թվականին այն ավարտին կհասցվի»,- մասնավորապես նշեց նախարարը։

Պատգամավորն արձագանքեց․ «Ես ճի՞շտ հասկացա, որ ծրագիրը չեք ձախողել, բայց կատարման մեջ թերացել եք, և սա հանգեցրել է նրան, որ մենք, փաստորեն, 2019 թվականին նախանշված ծրագիրը թողնում ենք 2020 թվականին, և դա ևս մեկ տարով հետաձգում է այն ներդրումային միջավայրի բարելավումը, որի մասին մենք այդքան խոսում ենք։ Եվ ամեն անգամ այդպես լինելով, ծրագիրը 1 տարով հետաձգելով՝ մենք արդյունք իրականում չենք ունենա։ Այսինքն՝ Դուք բավարար օպերատիվություն չեք ցուցաբերել ձեր աշխատանքում»։

«Որոշ չափով՝ այո՛»,- արձագանքեց Տիգրան Խաչատրյանը։

Մանրամասները՝ տեսանյութում։