Ազգային գրադարանի էլեկտրոնային շտեմարանները կրկին հասանելի են․ Հրաչյա Սարիբեկյան

Ուզում ենք հանրությանն իրազեկել, որ Հայաստանի Ազգային գրադարանի էլեկտրոնային շտեմարանները կրկին հասանելի են: Այս մասին այսօր հրավիրված ասուլիսում տեղեկացրեց գրադարանի տնօրենի պաշտոնակատար Հրաչյա Սարիբեկյանը։

Մայիսի 7-ին, հիշեցնենք, այրվել էր Ազգային գրադարանի թվայնացված առցանց շտեմարանի սերվերը, որտեղ պահվում է գրադարանի թվայնացված արխիվը:

Հրաչյա Սարիբեկյանի խոսքով՝ հրդեհից հետո տեղեկացրել էին, որ ծրագրային բոլոր ֆայլերը, թվայնացված գրականության և մամուլի ամբողջ բազան Ազգային գրադարանի առանձին կրիչներում պահված է եղել:

«Երկրորդ՝ մենք, սերվերների արտաքին տեսքից դատելով, կարող էինք ասել, որ դրանք բավականին հուսալի վիճակում են գտնվում, որովհետև մենք փորձաքննությունից հետո դրանց կոշտ կրիչները ստուգել էինք և համոզվել, որ ոչ մի կարևոր մաս վնասված չէ: Դա թույլ էր տալիս մեզ եզրակացնելու, որ հավանականությունը շատ քիչ է, որ սերվերները հնարավոր չէ նորից գործարկել»,- նշեց նա:

Նրա խոսքով՝ ինչպես ենթադրում էին՝ դեպքից 2-3 շաբաթ անց հնարավոր կլինի վերականգնել արխիվը։ «Վաղն արդեն 3 շաբաթն է լրանում, և մենք ուզում ենք հանրությանն իրազեկել, որ էլեկտրոնային շտեմարանները կրկին հասանելի են»,- ասաց գրադարանի տնօրենի պաշտոնակատարը։

Արդեն կատարվել է թեստային փորձարկում՝ ստուգելու համար՝ արդյո՞ք ամեն ինչ սարքին է։ Երկուշաբթի և երեքշաբթի օրերին էլեկտրոնային արխիվը հասանելի է եղել մինչ ժամը 18:00-ն, այսուհետ կապահովվի նաև դրա 24-ժամյա հասանելիությունը:

Հրաչյա Սարիբեկյանը, միաժամանակ, կոչ արեց զերծ մնալ գրադարանի արխիվի ոչնչացման մասին կանխակալ պնդումներից, ենթադրություններից ու շահարկումներից։