19.04.2024 | 23:26
Գցել են գետնին, ոտքը դրել գլխին և ձեռքերը ոլորելով՝ փորձել հանել հագուստը․ խոշտանգման մասին նոր ահազանգ․ ՏԵՍԱՆՅՈՒԹ
Ադրբեջանական ԶՈՒ-ում շատացել է կորոնավիրուսով վարակվածների ու դրա հետևանքով մահերի թիվը․ զինվորներին հարազատներից գաղտնի են հուղարկավորում
Քաղաքականություն
03.06.2020 | 18:20
Ադրբեջանական ընդդիմադիր լրատվամիջոցները վերջին շրջանում պարբերաբար տեղեկություններ են հրապարակում այն մասին, որ երկրի զինված ուժերում կորոնավիրուսով վարակվածների թիվը շատ մեծ է, և իշխանությունները սա թաքցնում են բնակչությունից։ Շատ դեպքերում վարակվածների հարազատները նույնիսկ տեղյակ չեն լինում, թե ինչ է տեղի ունեցել։
Մասնավորապես, freeazerbaijan.infօ կայքի տեղեկություններով, կորոնավիրուսով հիվանդ զինվորներին տեղափոխում են Ահմեդբեյլիի զինվորական հիվանդանոց։ Հիվանդներից վերցնում են բջջային հեռախոսները՝ հնարավորություն չտալով կապ հաստատել հարազատների հետ։
«Հիմա իրավիճակը կտրուկ վատացել է։ Հիվանդանոցում այլևս չկան ազատ տեղեր, իսկ հիվանդների հոսքը չի դադարում։ Բոլոր ծանր ու թեթև ախտանշաններ ունեցող հիվանդներին պահում են նույն վայրում, որի պատճառով վիրուսը երբեմն կրկնվում է»,- գրում է կայքը։
Լրատվամիջոցին հիվանդանոցի բուժանձնակազմից հայտնել են, որ ունեն դեղերի կարիք, վերակենդանացման բաժանմունքում ազատ տեղ չկա, բավարար չէ նաև թոքերի օդափոխության սարքերի թիվը։ Բացի այդ՝ հիվանդանոցում անձնական պաշտպանության միջոցների պակաս կա։ Նույնիսկ բուժանձնակազմի համար բավարար քանակով դիմակներ ու ախտահանիչ միջոցներ չկան, որի պատճառով նրանք վախենում են մոտենալ հիվանդ զինվորականներին։
«Հոսպիտալի տարածքն ամբողջովին վերահսկվում է ռազմական ոստիկանության կողմից։ Զինվորականների հարազատները, որոնք ամիսներով չեն կարողանում կապ հաստատել իրենց երեխաների հետ, տեղեկություն չունեն՝ նրանք ողջ են, թե՞ ոչ, քանի որ ոստիկանությունը ներս չի թողնում, ինֆորմացիայի արտահոսքի դեպքում էլ սպառնում է քրեական գործերով»,- գրել է կայքը։
Լրատվամիջոցի աղբյուրի փոխանցմամբ՝ ավելի քան 30 զինվորական է մահացել կորոնավիրուսից։ Նրանց հուղարկավորել են ալյումինե դագաղներով։ Հրապարակման մեջ նաև նշվում է, որ բոլոր դագաղները համարակալված են, ինչը նշանակում է, որ թաղումները ժամանակավոր են։
Կայքը նաև եզրակացնում է, որ այս մահերը հետագայում Ադրբեջանի ղեկավարությունը կարող է օգտագործել իր նպատակներով, մասնավորապես՝ ներկայացնել, որ նրանք մահացել են հայ-ադրբեջանական սահմանին՝ հակառակորդի կրակոցից։
Էմմա Չոբանյան
