Վլադիմիր Պուտինը հայտարարել է, որ Սահմանադրական հանրաքվեն և Հաղթանակի շքերթը նույն օրը կազմակերպելը ճիշտ չէ

ՌԴ նախագահ Վլադիմիր Պուտինը հայտարարել է, որ իր կարծիքով ճիշտ չէ սահմանադրական բարեփոխումների հանրաքվեն և Հաղթանակի օրվան նվիրված շքերթը միասին հունիսի 24-ին կազմակերպել։ Այս մասին հայտնում է ՏԱՍՍ-ը։

Պուտինը նշել է, որ քվեարկությունից առաջ 30 օր է անհրաժեշտ՝ տեխնիկական և այլ հարցերը լուծելու համար։

«Միտք կար՝ քվեարկությունը Հաղթանակի օրվա շքերթի հետ հունիսի 24-ին կազմակերպել, սակայն պետք չէ ոչինչ իրար խառնել։ Հաղթանակի օրը երկրի կյանքում առանձին նշանակալի իրադարձություն է։ Հաղթանակի շքերթը սրբություն է»,- ասել է ՌԴ նախագահը։

Նա ընդգծել է, որ Սահմանադրական փոփոխությունների հանրաքվեն Հաղթանակի շքերթի օրն անցկացնելը նաև գումար խնայելու նպատակ է ունեցել, քանի որ հունիսի 24-ը ոչ աշխատանքային օր է։ Խոսելով 30-օրյա ժամանակահատվածի մասին, Պուտինը նշել է, որ բազմաթիվ փաստաբանների կարծիքով՝ այն արդեն լրացել է և նոր ժամկետ նշանակելու կարիք չկա:

Պուտինը, սակայն, կարծում է, որ անհրաժեշտ է մարդկանց հնարավորություն տալ՝ կենտրոնանալ սահմանադրական փոփոխությունների վրա: «Սա ինքնին կարևոր փաստաթուղթ է, ուստի մարդիկ պետք է կայացնեն այդ որոշումը ՝ անկախ կորոնավիրուսային վարակի հետ կապված դժվար իրավիճակներից»,- եզրափակել է ՌԴ նախագահը։

Հիշեցնենք՝ մայիսի 26-ին ՌԴ պաշտպանության նախարար Սերգեյ Շոյգուի հետ տեսակոնֆերանսի ռեժիմով անցկացված հանդիպման ժամանակ Պուտինը կարգադրել էր Հաղթանակի օրվա շքերթն անցկացնել հունիսի 24-ին, իսկ «Անմահ գնդի» շքերթը՝ հուլիսի 26-ին։ Մայիսի 9-ին Երկրորդ աշխարհամարտում տարած հաղթանակի 75-ամյակի կապակցությամբ նախանշված շքերթը հետաձգվել էր կորոնավիրուսի համաճարակի պատճառով։

Նելլի Մելքոնյան