Հետաձգել, թե՞ ընդունել՝ նոր, խիստ կանոններով. ինչպիսի՞ն կլինի առաջին դասարանցիների ուսումնական պրոցեսի ձևաչափը. ՏԵՍԱՆՅՈՒԹ

Կորոնավիրուսի տարածմամբ պայմանավորված՝ Հայաստանում 2020-2021 ուսումնական տարում առաջին դասարանցիների  կրթության իրականացման ձևաչափը դեռևս հայտնի չէ: Մինչ Կրթության, գիտության, մշակույթի և սպորտի նախարարությունում քննարկվում են մի քանի տարբերակներ, ոլորտի մասնագետները, ուսուցիչներն ու ծնողները հանդես են գալիս առաջարկներով:  Կրթության փորձագետ Սերոբ Խաչատրյանը պնդում է՝ պետք է անել ամեն բան՝ առաջին դասարանցիների ուսումնական պրոցեսը հենց դպրոցում կազմակերպելու համար:

Մարիամ Ջիլավյանը սեպտեմբերին պատրաստվում է  որդուն առաջին դասարան ուղարկել և արդյունավետ է համարում միայն աշակերտների ֆիզիկական ներկայությամբ դասապրոցեսը: Քննարկվում է նաև առաջին դասարանցիների ուսումնական պրոցեսի մեկ այլ ձևաչափ, ըստ որի՝ դասարանը կբաժանվի մի քանի մասի՝ վիրուսով վարակվելու վտանգը հնարավորինս մեղմելու համար: Այս պարագայում անհրաժեշտ կլինի խստորեն պահպանել սանիտարահիգիենիկ կանոններն ու պահպանել ֆիզիկական հեռավորությունը: Ի դեպ, մարզերի հանրակրթական մի շարք դպրոցներում դասարանը բաժանելու խնդիր չի էլ առաջանա, քանի որ աշակերտների թիվը փոքր է. կան ընդամենը 5-6 հոգանոց դասարաններ,  ուստի դասարանների բաժանումը  հիմնականում կարիք կլինի կատարել խոշոր քաղաքներում: Դպրոցները կարող են օգտագործել նաև բակային, բացօթյա տարածքները՝ վիրուսից հնարավորինս  պաշտպանվելու համար:

Տարրական դասարանների դասվար Արփենիկ Հովակիմյանը նշում է, որ դասարանները բաժանելու վերաբերյալ խոսակցություններ եղել են նաև ուսուցչական շրջանակներում և շատերը պատրաստ են այդ մեթոդով աշխատել:

Նշենք, որ ֆեյսբուքյան իր լայվի միջոցով ԿԳՄՍ նախարար Արայիկ Հարությունյանը վերջերս  հստակ նշեց՝ 2014 թվականին ծնված բոլոր երեխաները այս տարի պետք է հաճախեն դպրոց: Հունիսի 1-ից կմեկնարկի առաջին դասարանցիների առցանց գրանցումը: Արայիկ Հարությունյանը հատուկ կոչ արեց  բոլոր այն ծնողներին, որոնք անորոշության մեջ են և հրաժարվում են առցանց գրանցել երեխաներին, շտապել իրականացնել գրանցումը:

Հավելենք, որ մի շարք երկրներում կորոնավիրուսի պայմաններում արդեն իսկ կազմակերպվել են դպրոցականների ֆիզիկական ներկայությամբ դասապրոցեսներ: Չինաստանն առաջին երկիրն էր, որտեղ աշակերտը վերադարձավ դպրոց, վերականգնվեցին դասերը, Շվեդիան, առհասարակ չի փակել դպրոցները, իսկ, օրինակ, Դանիայի և Իսլանդիայի դպրոցները  պատրաստվում են մայիսի վերջից ընդունել աշակերտների՝ խստորեն  հետևելով սանիտարահիգիենիկ կանոններին, պլաստիկե սեկցիաների միջոցով ապահովելով ֆիզիկական հեռավորությունը:

Աննա Բաբաջանյան