19.01.2026 | 23:38
Ռուբիոն բարձր է գնահատել Ադրբեջանի կառավարության կողմից Հայաստան վառելիքի մատակարարումները
2.1 մլրդ դրամ՝ Ադրբեջանից բռնագաղթած ընտանիքներին բնակարանով ապահովելու համար. ՏԵՍԱՆՅՈՒԹ
Հասարակություն
27.05.2020 | 12:05
Կառավարության այսօրվա նիստում որոշում կայացվեց, որով մեկնարկում է Ադրբեջանից բռնագաղթած անձանց բնակապահովման ծրագրի երկրորդ փուլը՝ բնակարանների գնման վկայագրեր տրամադրելու միջոցով:
Տարածքային կառավարման և ենթակառուցվածքների նախարար Սուրեն Պապիկյանը նշեց, որ մասնավորապես, նախատեսվում է 2 մլրդ 169 մլն դրամ ուղղել Երևանի Կենտրոն, Էրեբունի, Նոր Նորք, Արաբկիր, Դավիթաշեն վարչական շրջաններում ժամանակավոր կացարաններում բնակվող ընտանիքներին բնակարանով ապահովելու հարցի լուծմանը:
Նա հիշեցրեց, որ 2019-ին՝ առաջին փուլում, 1․5 մլրդ դրամ հատկացվել է 112 ընտանիքի բնակարանային հարցը լուծելու համար, իսկ այս փուլում խոսքը 185 ընտանիքի մասին է:
Վարչապետ Նիկոլ Փաշինյանը հետաքրքրվեց, թե որքա՞ն գումար են տալիս ամեն ընտանիքի: Պապիկյանը պատասխանեց, որ դա կախված է ընտանիքի անդամների թվից և այլ չափանիշներից. «Ամեն դեպքում՝ դա բավարար է Երևանի տարբեր հատվածներում բնակարան գնելու համար»:
«Իհարկե, կենտրոնում չեն գնի, բայց այլ վարչական շրջաններում կկարողանան գնել»,- արձագանքեց Փաշինյանը:
Նշվեց նաև, որ նախկինում Երևան քաղաքի համար նման որոշում չի եղել, այս քաղաքացիները 1988 կամ 1990 թվականներից բնակվում են ժամանակավոր կացարաններում:
Մանրամասները՝ տեսանյութում։
