Պետությունը երեխա ունեցող ընտանիքներին կօգնի բնակարան գնել․ կառավարության աջակցության 3 ծրագրերը

Ծնելիության մակարդակը բարձրացնելու համար կառավարությունը հաստատել է երեխա ունեցող ընտանիքների բնակարանային ապահովության պետական աջակցության 3 ծրագիր։

Առաջին ծրագրով պետությունը կօգնի բնակարանի կանխավճարի հարցում։ Պայմաններն են՝ մարզում բնակվելը, 2 և ավելի անչափահաս երեխա ունենալը և անշարժ գույքը 2020 թվականի հուլիսի 1-ին կամ դրանից հետո ձեռք բերելը։ Միանվագ դրամական աջակցությունը նոր բնակարանի արժեքի 5% չափով է, բայց ոչ ավելի, քան 1 միլիոն դրամը։

Երկրորդ ծրագրից կարող է օգտվել արդեն առնվազն 1 մեկ երեխա ունեցող յուրաքանչյուր ընտանիք, որը բնակարան կգնի 2020 թվականի հուլիսի 1-ին կամ դրանից հետո՝ առավելագույնը 30 միլիոն դրամ արժողությամբ։ Դրամական աջակցությունը կլինի տարեկան ապահովագրական վճարի 90%-ի չափով, բայց ոչ ավելի, քան տարեկան 180 հազար դրամը։

Երրորդ ծրագրի դեպքում պարտադիր է, որ երեխան ծնվի հուլիսի 1-ից հետո, իսկ հիփոթեքով բնակարանն ընտանիքը կարող է մինչ այդ ձեռք բերած լինել։ Ծնվող առաջին և երկրորդ երեխայի դեպքում աջակցությունը կլինի վարկի մնացորդային մայր գումարի 10%-ի չափով, եթե ընտանիքը մարզում է ապրում, իսկ եթե Երևանում՝ 5%-ի չափով, բայց ոչ ավելի, քան կես միլիոն դրամը։

Հաջորդ երեխաների դեպքում աջակցության չափը կարող հասնել մինչև 50%-ի։ 2020 թվականի բյուջեով բնակարանային ապահովության պետական աջակցության ծրագրի համար հատկացված է 526 միլիոն դրամ։ Նախատեսվում է, որ օժանդակության այս 3 ծրագրից, ընդհանուր առմամբ, 1085 ընտանիք կօգտվի։

Մանրամասները՝ տեսանյութում։