18.11.2024 | 09:41
Աղվանի-Տաթև ավտոճանապարհին տեղ-տեղ առկա է մերկասառույց
Եթե մեզ մոտ զարգանա իտալական սցենարը, ապա կունենանք 10 հազար մահ. Նիկոլ Փաշինյան. ՏԵՍԱՆՅՈՒԹ
14.05.2020 | 11:17
Երեկ մենք կրկին արձանագրել ենք կորոնավիրուսի 142 նոր դեպք, մենք վերջին շրջանում ունենք 100-ը գերազանցող ամենօրյա դեպքեր: Կառավարության այսօրվա նիստի մեկնարկին այս մասին ասաց ՀՀ վարչապետ Նիկոլ Փաշինյանը:
«Բացի տեխնիկակազմակերպչական հարցերից՝ ես արձանագրել եմ մի, այսպես ասած, սոցիալ-հոգեբանական խնդիր: Բանն այն է, որ Հայաստանի քաղաքացիների շրջանում ակտիվորեն տարածվում է, որ կորոնավիրուս հիվանդությունն իրականում բլեֆ է, գոյություն չունի, սարքած գործ է և այլն: Իհարկե, ժպիտներից անդին՝ պետք է հասկանալ, թե ինչն է այսպիսի ընկալման պատճառը, և պետք է ասել, որ սա ունի կոնկրետ պատճառ»,- ասաց վարչապետը:
Նրա խոսքով՝ բանն այն է, որ հիվանդների 75 տոկոսի մոտ հիվանդությունն ընթանում է ասիմպտոմ. «Այսինքն՝ նրանց համար այդ հիվանդությունն ընդամենը թղթի վրա գրված ախտորոշում է և լուր, որ ձեր թեստը դրական է: Այս հիվանդությունը շոշափելի իրենց վրա զգում են այն քաղաքացիները, ում ընտանիքի անդամները, տարիքով մարդիկ հիվանդանում են, նրանց վիճակը ծանրանում է կամ, ցավոք, 49 դեպքերում հասնում է մահվան»:
Անդրադառնալով արտակարգ դրության ռեժիմը երկարացնելուն՝ Փաշինյանն ասաց՝ ռազմավարությունն այն է, որ պետք է գնալ ոչ թե սահմանափակումներ կիրառելու ճանապարհով, այլ արտակարգ դրության պայմաններում մարդկանց փորձեն համոզել, որտեղ անհրաժեշտ է՝ պարտադրել, որ պահպանեն անվտանգության որոշակի կանոններ:
«Մարտին ունեինք հաշվարկ, որ եթե հանկարծ մեզ մոտ իրադարձությունը զարգանա, օրինակ, իտալական սցենարով, մեկ ամսվա ընթացքում մենք կորոնավիրուսից կունենանք 10 հազար մահ»,- այս ընթացքում գործող սահմանափակումների առնչությամբ նշեց վարչապետը:
Մանրամասները՝ տեսանյութում:
