16.05.2024 | 23:39
Խաղաղության պայմանագիրը պատմական հնարավորություն է տարածաշրջանի համար. Էրդողան
Դասախոսի ազատ արտահայտվել-չարտահայտվելը միայն նրա խնդիրն է. ԵՊՀ գիտական քարտուղար
Հասարակություն
13.11.2017 | 14:55
ԵՊՀ գիտական քարտուղար Մենուա Սողոմոնյանը համաձայն չէ այն տեսակետների հետ, որ Հայաստանում ակադեմիական ազատությունը գտնվում է զրոյական վիճակում: «Հոդված 3» ակումբում հրավիրված «Բուհական ազատության ու քաղաքականացվածության խնդիրները» թեմայով հանրային քննարկման ընթացքում Մենուա Սողոմոնյանը պնդեց՝ օրենսդրական շրջանակում այդ հնարավորությունները տրված են:
«Այդ ազատություններն, ըստ էության, պետք է վերաբերեն բուհի կանոնադրական նպատակներին առնչվող ազատություններին, այսինքն՝ կրթություն, հետազոտություն: Այս առումով ասել, որ բուհերը չեն կարողանում ազատորեն սահմանել իրենց հետազոտական գերակայությունները, սահմանել ուղղությունները և առկա ռեսուրսների պարագայում դա իրականացնել, ասել, որ բուհերը չեն կարողանում սահմանել իրենց կրթական ծրագրերի կառուցվածքն ու բովանդակությունը, այդպես չէ, թույլ տվեք չհամաձայնել»,- ընդգծեց Մենուա Սողոմոնյանը:
ԵՊՀ գիտական քարտուղարը համաձայն է, որ սահմանափակումներ կան, մասնավորապես՝ ընդունելության կենտրոնացված գործընթացն այդ սահմանափակումներից մեկն է բակալավրիատի մակարդակում: «Բայց մագիստրատուրայի մակարդակում այդ ազատությունը կա»,- հավաստիացրեց Մենուա Սողոմոնյանը:
Անդրադառնալով այս օրերին ընթացող դասադուլներին և դասախոսների նկատմամբ հնարավոր ճնշումներին՝ բանախոսն ասաց, որ դասախոսի ազատ արտահայտվել-չարտահայտվելը միայն նրա խնդիրն է: «Ինչ վերաբերում է հրահանգներին՝ խոսել կամ չխոսել, ապա մեկ-երկու նման գրառում է եղել Ֆեյսբուքում» ,- հավելեց բանախոսը:
