06.07.2026 | 17:33
Նախորդ շաբաթ գրանցվել է 844 դեպք, որից 355-ը՝ արտակարգ. ՆԳՆ փրկարար ծառայություն
ՌԴ-ում ոչ աշխատանքային օրերի ռեժիմը երկարաձգվել է մինչև մայիսի 11-ը ներառյալ. Պուտինի ելույթի հիմնական կետերը
Քաղաքականություն
28.04.2020 | 22:07
Ռուսաստանում ոչ աշխատանքային օրերի ռեժիմը երկարաձգվել է՝ մինչև մայիսի 11-ը ներառյալ: Կորոնավիրուսի տարածումը կանխելու հարցով այսօրվա խորհրդակցության ժամանակ այս մասին ասել է ՌԴ նախագահ Վլադիմիր Պուտինը՝ ընդգծելով, որ այդ ժամանակաընթացքում պետք է խստորեն հետևել կանխարգելիչ միջոցառումներին:
ՏԱՍՍ-ը ներկայացրել է խորհրդակցության ժամանակ ՌԴ նախագահի ելույթի առանցքային կետերը:
Աղբյուրի փոխանցմամբ՝ Պուտինը նախարարների կաբինետին հանձնարարել է մայիսի 12-ից սահմանափակումների ռեժիմից դուրս գալու չափորոշիչներ մշակել: Նա նաև ընդգծել է, որ բոլոր սահմանափակումներն ամբողջ երկրում միանգամից չեն վերացվելու, և «առջևում դժվարին ճանապարհ կա» անցնելու:
Կառավարությանը հանձնարարվել է նաև առաջիկայում բիզնեսին և քաղաքացիներին աջակցության միջոցառումների նոր փաթեթ մշակել: Նախագահը նշել է, որ նախարարներն ու նահանգապետերն անձնական պատասխանատվություն են կրելու այդ միջոցառումների իրականացման համար:
Առողջապահության նախարարությանը ՌԴ նախագահը հանձնարարել է իրավիճակի անդադար մոնիթորինգ անցկացնել՝ և՛ ամբողջ երկրում, և՛ դաշնության յուրաքանչյուր սուբյեկտում՝ հաշվի առնելով, որ իրադրությունը գրեթե ամեն օր է փոխվում:
Վլադիմիր Պուտինը, միաժամանակ, առաջարկել է ապրիլի 28-ը ՌԴ-ում Շտապօգնության աշխատակցի օր հռչակել:
Խոսելով կորոնավիրուսի տարածման մասին՝ Պուտինը նշել է, որ Ռուսաստանում հաջողվել է արգելակել համաճարակի տարածումը, ինչն ընդհանուր աշխատանքի, միլիոնավոր քաղաքացիների պատասխանատվության արդյունք է: Նա, սակայն, նշել է, որ իրադրությունը շարունակում է բարդ մնալ:
«Ամեն օր հիվանդության նոր դեպքերի բացահայտումը համեմատաբար կայունացել է: Բայց դա չպետք է մեզ հանգստացնի, իրավիճակը շարունակում է բարդ մնալ: Մասնագետներն ու գիտնականներն ասում են, որ պիկը դեռ չի անցել»,- նշել է ՌԴ նախագահը:
