17.10.2026 | 19:25
Հռոմի պապ Լևոն XIV-ը լքել է հիվանդանոցը՝ թոքի ուռուցքի հեռացման վիրահատությունից հետո
Ես էլ կասեմ, որ յուրաքանչյուր ընտանիքի 1 միլիոն է պետք հատկացնել, դա պոպուլիզմ է. Հաղթանակ Շահումյան
Քաղաքականություն
28.04.2020 | 21:13
«Եթե վաղը ինձ ԱԺ-ում ելույթի հնարավորություն տան, ես էլ կասեմ, որ յուրաքանչյուր ընտանիքի ոչ թե 100 հազար դրամ, այլ 1 միլիոն է պետք հատկացնել: Մարուքյանը պոպուլիստական հայտարարություն է արել: Այս երկիրն այնպես է թալանվել, որ չի կարողանում նույնիսկ իր պարտքերը փակել, ուր մնաց՝ աջ ու ձախ այդ քանակի գումար բաժանի»,- Factor.am-ի հետ զրույցում նման տեսակետ հայտնեց գեղանկարիչ Հաղթանակ Շահումյանը:
Հիշեցնենք, որ ԼՀԿ խմբակցության ներկայացուցիչները նշում են՝ պետք է կարիքավոր 550 հազար ընտանիքների 100 հազարական դրամ բաժանել։ Մասնավորապես, ԱԺ ԼՀԿ խմբակցության ղեկավար Էդմոն Մարուքյանն այդ հայտարարությունն անում է, քանի որ գիտի՝ Հայաստանն այս ճգնաժամ է մտել համապատասխան խնայողություններով և գանձապետական հաշվում 300 մլրդ դրամից ավելի փող կա:
Նկարչի խոսքով՝ ժողովուրդն, իհարկե, ունի այդ գումարի կարիքը, սակայն պետությունն այդ հնարավորությունը չունի, իսկ 100 հազար դրամ տալու հայտարարությունն արվում է լոկ մարդկանց սրտերը շահելու և քաղաքական դիվիդենտներ հավաքելու համար:
Մեր զրուցակիցն անդրադարձավ նաև ՀՀ կառավարության կողմից կորոնավիրուսի դեմ պայքարի քայլերին: Ըստ նրա՝ մեր երկիրը շատ ավելի արդյունավետ է պայքարում վիրուսի դեմ, քան ֆինանսապես ավելի կայուն շատ երկրներ:
Դիտարկմանը, որ մեր քաղաքացիների մի ստվար զանգված չի պահպանում պարետի սահմանած նորմերը, իսկ իրավապահ մարմիններն էլ բացարձակապես խիստ չեն վերահսկում, պարոն Շահումյանը հակադարձեց. «Կոնկրետ քաղաքի այն հատվածում, որտեղ ես եմ ապրում, մեքենաների և մարդկանց հոսքը կտրուկ կանգ էր առել: Հաղթանակի կամրջի վրա մեքենաներ չէին անցնում: Միայն վերջին երկու օրն է ակտիվություն նկատվում»:
Աննա Բաբաջանյան
