«Պետական բյուջեն անձնական գրպան չէ»․ Ա․ Թորոսյանի խորհրդականը՝ ավագանու ԲՀԿ-ական անդամին. ՏԵՍԱՆՅՈՒԹ

Պարոն Մանրիկյանը քննադատությամբ հանդես եկավ Նորքի սրտաբանականի հետ կապված՝ «գցոցի» արտահայտությունն օգտագործելով։ Պարո՛մն Մանրիկյան, խնդիրը հետևյալում է․ պետական բյուջեն անձնական գրպան չի։ Ելույթ ունենալուց առաջ պետք է ծանոթանալ՝ ինչ պայմանագրերով է պետությունն աշխատում բժշկական կազմակերպությունների հետ, նոր փորձել քննադատել։ Այս մասին այսօր Երևանի ավագանու նիստին նշեց ավագանու «Իմ քայլը» խմբակցության անդամ Աշոտ Սարգսյանը, ով նաև Առողջապահության նախարար Արսեն Թորոսյանի խորհրդականն է։

«Նորքի սրտաբանականը 2019-ից գրեթե 1 մլրդ դրամով ավել բյուջե է ստանում։ Ու եթե պետությունը պատվեր է տալիս բժշական կազմակերպությանը, որ կոնկրետ ծավալի շրջանակում արվի աշխատանք, արվում է այդքան աշխատանք։ Այստեղ «գցոցու» խնդիր չկա։ Պայմանագրից դուրս արվել է աշխատանք, որը մնում է Առողջապահության նախարարության ֆինանսական հնարավորության կարողության վրա։ Ունի հնարավորություն, փոխհատուցում է, չէ՝ խնդիրն այլ կերպ է լուծվում»,- ասաց ավագանու անդամը։

Ի պատասխան՝ ավագանու «Բարգավաճ Հայաստան» խմբակցության անդամ Միքայել Մանրիկյանը նշեց․ «Ինձ համար սպասելի էր, որ այս թեման Առողջապահության նախարարության համար ցավոտ կլինի, բայց որ այս կարգի, անսպասելի էր։ Կասեմ հետևյալը․ պարո՛ն Սարգսյան, կատարվել է աշխատանք, կա չվճարված 170 միլիոն դրամի պետպատվեր և ինչ-որ մեկը պետք է սրա համար պատասխանատվություն կրի՝ անկախ նրանից՝ մեղավոր է Առողջապահության նախարարությունը, թե Երևանի քաղաքապետարանը»։

Ավագանու անդամներին միջամտեց քաղաքապետ Հայկ Մարությանը․ «Պարո՛ն Սարգսյան, կխնդրեմ, որ, այնուամենայնիվ, որպես ավագանու անդամ լինեք մեր ավագանու նիստերին և այդ պահին օրակարգային հարցի շուրջ Ձեր կարծիքն արտահայտեք։ Եթե ուզում եք ներկայացնել ԱՆ դիրքորոշումը, կարծիքը կամ կողմը Երևանի ավագանիում, ուրեմն պետք է նաև նիստին ներկա լինեք, ցավդ տանեմ»։

Մանրամասները՝ տեսանյութում։

Նելլի Մելքոնյան