06.04.2026 | 18:27
ՀԱԿ-ը ընտրություններին կմասնակցի առանձին․ «Ուժեղ Հայաստան»-ի հետ դաշինքը չի կայացել
Հայաստանի 27 քաղաքացի 5 օր է՝ «Դոմոդեդովո» օդանավակայանում է․ ՀՀ ԱԳՆ-ն հորդորում է հերթագրվել
Հասարակություն
26.04.2020 | 17:30
Ռուսաստանի «Դոմոդեդովո» օդանավակայանում գտվող 27 հայեր օրեր շարունակ չեն կարողանում վերադառնալ Հայաստան։ Այս մասին տեղեկացնում է «Մաթևոսյան» հյուրատան ֆեյսբուքյան էջը՝ կից ներկայացնելով տեսանյութ։
«Մեր հայրենակիցները՝ 27 հոգի, արդեն 5 օր սպասում են հայրենիք վերադառնալուն Մոսկվայի Դոմոդեդովո օդանավակայանում, ամսի 27/04/2020 Դոմոդեդովո օդանավակայանից թռիչք է իրականացնելու դատարկ ինքնաթիռ։ Օդանավակայանի անձնակազմը և օդանավակայանը թույլ են տալիս քաղաքացիների թռիչքը դեպի Հայաստան, իսկ մեր քաղաքացիներին մերժում են Հայաստանից և հայկական դեսպանատնից»,- նշված է գրառման մեջ։
ՀՀ արտաքին գործերի նախարարության մամուլի խոսնակ Աննա Նաղդալյանը Factor.am-ի հետ զրույցում նշեց, որ տեղեկությունը, որ «Դոմոդեդովո» օդանավակայանից ապրիլի 27-ին թռիչք է տեղի ունենալու, չի համապատասխանում իրականությանը։
«Առաջիկա օրերին թռիչք չի լինելու, իսկ «Դոմոդեդովո» օդանավակայանում գտնվող քաղաքացիներին առաջարկվել է կացարան, որից վերջիններս հրաժարվել են։ ՌԴ-ում Հայաստանի Հանրապետության դեսպանությունում կան մարդիկ հերթագրված դեռ ապրիլի 1-ից, և նախապատվությունը տրվելու է ըստ հերթագրման ժամանակացույցի, ուստի «Դոմոդեդովո»-ում գտնվող մեր քաղաքացիներին կոչ ենք անում հերթագրվել և հնարավորության դեպքում նաև օգտվել կացարանի հնարավորությունից»,- նշեց Աննա Նաղդալյանը։
Վերջինիս խոսքով՝ առաջիկայում թռիչք է նախատեսվում Ուկրաինայից և մի քանի այլ երկրներից, որի միջոցով ՀՀ քաղաքացիները կվերադառնան Հայաստան։ Անդրադառնալով Մոսկվայից նախատեսվող թռիչքներին, Նաղդալյանը նշեց, որ հստակ օր դեռ չեն կարող ասել, քանի որ թռիչքը իրենից ենթադրում է նախապատրաստական աշխատանքներ։
Հիշեցնենք, որ ապրիլի 23-ին Մոսկվա-Սանկտ Պետերբուրգ-Երևան չվերթով հայրենիք է վերադարձել ավելի քան 230 քաղաքացի։
