10.08.2026 | 14:37
ՌԴ-ում ձերբակալում են ռուս զինվորականների գերեզմանները լուսանկարողներին
Մայր աթոռի հայտարարությունը վարչապետ Փաշինյանի՝ հոգևորականությանն ուղղված որակումների ու գնահատականների առնչությամբ
Հասարակություն
21.04.2020 | 14:43
Մայր աթոռ Սուրբ Էջմիածնի տեղեկատվական համակարգը հայտարարություն է տարածել, որում ասվում է.
«Հայաստանի Հանրապետության վարչապետ Նիկոլ Փաշինյանը ապրիլի 20-ի իր տեսաուղերձում ի շարս այլ հարցերի անդրադարձ կատարեց նաև հոգևորականությանը՝ հընթացս որակումներ ու գնահատականներ հնչեցնելով նրանց գործունեության վերաբերյալ։
Այս օրերին, երբ մեր ժողովուրդը պատրաստվում է աղոթքով իր խոնարհումը բերելու Հայոց Ցեղասպանության սուրբ նահատակների հիշատակի առջև, Մայր Աթոռ Սուրբ Էջմիածինը, չհամաձայնելով հանդերձ տրված գնահատականներին ու արտահայտված տեսակետներին, այս պահին ձեռնպահ է մնում անդրադառնալ վերջիններիս։
Ցեղասպանության սուրբ նահատակների հիշատակի օրվա նախաշեմին Նորին Սրբություն Գարեգին Երկրորդ Ամենայն Հայոց Կաթողիկոսի հայրական հորդորն է՝ զերծ մնալ հակառակություններից ու շահարկումներից և սիրո, համերաշխության ու միաբանության ոգով հայցել բարեխոսությունը մեր սուրբ նահատակների՝ ի նպաստ հայրենիքի զորացման, համազգային կյանքում առկա մարտահրավերների հաղթահարման և մեր ժողովրդի բարօրության»,- ասված է հայտարարությունում:
Հիշեցնենք, որ երեկ վարչապետ Նիկոլ Փաշինյանը ֆեյսբուքյան ուղիղ եթերում անդրադառնալով, իր իսկ խոսքերով, «մեծ հիասթափության մոդելավորմանը», նշել էր, որ նաև հիասթափվելու շատ կոնկրետ պատճառ ունի, պայմանականորեն ասած, հոգևորականությունը:
«Մենք հաճախ հոգևորականության գործունեության մեջ տեսնում ենք քաղաքականություն, երբեմն քաղաքական ինտրիգներ, քան Աստվածաշնչից և նրա գաղափարախոսությունից բխող գործունեություն: Ես՝ որպես մարդ, որ շատ կարևոր է համարում քրիստոնեական տեսությունը, ինձ հարց եմ տալիս, արդյոք այսօրվա հոգևոր կյանքը մեզ մոտեցնո՞ւմ է աստվածաշնչյան տեքստին և գաղափարախոսությանը, Նոր կտակարանին և նրա գաղափարախոսությանը, վստահ չեմ, որ այդ հարցին կարող եմ դրական պատասխան տալ»,- նկատել էր վարչապետը:
