30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Ավստրալիայի քաղաքական առաջնորդներն ապրիլի 24-ին ուղիղ եթերով հարգանքի տուրք կմատուցեն Հայոց ցեղասպանության զոհերի հիշատակին
Քաղաքականություն
20.04.2020 | 19:23
Ավստրալիայի քաղաքական առաջնորդներն ապրիլի 24-ին ուղիղ եթերով հարգանքի տուրք կմատուցեն Հայոց ցեղասպանության զոհերի հիշատակին: Այս մասին տեղեկանում ենք Ավստրալիայի Հայ դատի հանձնախմբի պաշտոնական կայքից։
Ուղիղ եթերի մասնակիցների թվում կլինեն Նոր Հարավային Ուելսի վարչապետ Գլեդիս Բերեջիկլյանը, դաշնային պատգամավորներ Թիմ Ուիլսոնը, Ջոել Ֆիթգհիբոնը, Թրենթ Ցիմերմանը և Քրիսթինա Քենիլին։
Քաղաքական գործիչները համերաշխության տեսաուղերձներ կհնչեցնեն Հայոց ցեղասպանության թեմայով։
Աղբյուրի փոխանցմամբ՝ Ավստրալիայի Հայ դատի հանձնախումբը ողջունել է նախաձեռնությունը։
«Կարևոր է, որ համայնքը մեր ընտրած խորհրդարանականներից է լսում ու տեսնում, թե ինչպես են մեր ջանքերը ձևավորել համախոհների մի խումբ, որը կոչ է անում Ավստրալիային ճանաչել Հայոց ցեղասպանությունը, ավելին՝ պահանջել արդարություն»,- հայտարարել է Ավստրալիայի Հայ դատի հանձնախմբի տնօրեն Հայկ Կայսերյանը։
Ուղիղ հեռարձակումը տեղի կունենա Ավստրալիայի ժամանակով 19։30-ին։ Այն կփոխարինի Սիդնեյում, Մելբուրնում և Ավստրալիայի այլ խոշոր քաղաքաներում ամեն տարի ապրիլի 24-ին անցկացվող միջոցառումներին։
Նշվում է, որ միջոցառումն անցկացվում է Նորին Սրբություն Հայկազուն արքեպիսկոպոս Նաջարյանի, Հայ Առաքելական, Հայ Կաթոլիկ և Հայ Ավետարանչական եկեղեցու հովանու ներքո:
Նելլի Մելքոնյան
