Ուսանողները պետք է մտածեն նոր քայլերի մասին, որովհետև սաքուլիկները կամաց-կամաց միջամտելու են. Դավիթ Սանասարյան

«Հանուն Հայաստան պետության ճակատ»-ի անդամ Դավիթ Սանասարյանի կարծիքով՝ թեև ուսանողներն այս օրերին գրագետ պայքար են մղում տարկետման իրավունքի գործող կարգը պահպանելու համար, այդուհանդերձ նրանք պետք է առաջ քաշեն կրթական ոլորտում արմատական բարեփոխումներ իրականացնելու հարցը:

«Համալսարանում շատ ավելի կարևոր խնդիրներ կան, որակյալ կրթություն չեն ստանում: Երբ այստեղի շրջանավարտը իր կրթության մի հատվածը ստանում է արտերկրում, հասկանում է՝ այն, ինչ այստեղ սովորում են, կրթություն չի: Այժմ ուսանողները պետք է կոնկրետ հարց դնեն՝ կրթության որակը բարձրացնելու, որի մեջ կմտնեն նաև կոռուպցիոն խնդիրները»,- Factor.am-ի հետ զրույցում ասաց Դավիթ Սանասարյանը՝ ընդգծելով, որ համակարծիք է ուսանողների հետ, որ առաջարկվող օրենսդրական փոփոխությամբ գիտությունը կտուժի:

Հիշեցնենք՝ այսօր արդեն երրորդ օրն է՝ ինչ հարյուրավոր ուսանողներ դասադուլ են հայտարարել և պահանջում են պահպանել տարկետման տրամադրման գործող կարգը:

Քաղաքացիական պայքարի մեծ փորձ ունեցող Դավիթ Սանասարյանը պարտությունների իր փորձից ելնելով՝ ուսանողներին կոչ արեց պայքարը շատ չձգձգել. «Եղանակային պայմանները , ժամանակը ձգելն իրենց օգտին չի աշխատելու: Պետք է մտածեն նոր քայլերի մասին, որովհետև համալսարաններում հայտնի սաքուլիկները միջամտելու են՝ փորձելով տարբեր եղանակներով ետ քաշել ուսանողներին: Եթե պրոցեսը երկարի, իշխանություններն ամեն ինչ անելու են, որ այս ամենը հանդարտվի»:

Factor.am-ի հարցին՝ հնարավոր համարում է, որ իշխանությունները ընկրկեն, և Ազգային ժողովի կողմից առաջին ընթերցմամբ ընդունված «Զինվորական ծառայության և զինծառայողի կարգավիճակի մասին» օրինագիծը չեղարկեն՝ Դավիթ Սանասարյանը պատասխանեց. «Որքան արմատական են տրամադրված Վիգեն Սարգսյանն ու իր թիմակիցները, դրանից ավելի արմատական պիտի տրամադրվեն ուսանողները: Հակառակ դեպքում չի լինելու որևէ փոխզիջումային տարբերակ, լինելու է այն, ինչ իշխանությունները ներկայացնում են»:

Հարցազրույցն ամբողջությամբ՝ տեսանյութում:

Շողիկ Գալստյան