Քաղաքականություն
15.04.2020 | 23:21
Նոր Զելանդիայի վարչապետը հայտարարել է, որ երկրում կորոնավիրուսի տարածմամբ պայմանավորված՝ 6 ամիս շարունակ 20%-ով կկրճատվեն իր, նախարարների և պետական ծառայության մարմինների ղեկավարների աշխատավարձերը։ Այս մասին հայտնում է The Guardian-ը։
Ջասինդա Արդերը կարևոր է համարել կառավարության ամենաբարձր վարձատրվող անդամների կողմից միասնական վերաբերմունքի ցուցաբերումն առաջնագծում գտնվող աշխատողներին, ինչպես նաև նրանց, ովքեր կորցրել են իրենց ապրուստի միջոցները։ Արդյունքում՝ Նոր Զելանդիայի վարչապետի աշխատավարձը կկրճատվի 47․104 նոր զելանդական դոլարով, ինչը համարժեք է 28․237 ամերիկյան դոլարի:
Նախարարներից յուրաքանչյուրինը՝ 26․900 նոր զելանդական դոլարով, այսինքն՝ շուրջ 16 հազար ԱՄՆ դոլարով։ Իսկ փոխվարչապետ Ուինսթոն Փիթերսի աշխատավարձը կկրճատվի 33․473 նոր զելանդական դոլարով, ինչը կազմում է մոտ 20 հազար ամերիկյան դոլար:
«Հիմա մարդկանց խմբերի միջև եղած անջրպետը վերացնելու ժամանակն է։ Ես պատասխանատու եմ գործադիրի համար և սա այն է, ինչ մենք կարող ենք անել։ Սրանով մենք միասնականություն ենք ցուցաբերում այն ժամանակ, երբ Նոր Զելանդիան կարիքի մեջ է»,- ասել է Նոր Զելանդիայի վարչապետ Ջասինդա Արդերը։
Նա նաև հայտարարել է, որ աշխատավարձերի կրճատումը չի ազդի կառավարության ընդհանուր հարկաբյուջետային դիրքի վրա։
Japan Times—ի փոխանցմամբ՝ նույնչափ՝ 20%-ով էլ կկրճատվի Ճապոնիայի օրենսդիրների աշխատավարձը։ Ի տարբերություն Նոր Զելանդիայի, այստեղ աշխատավարձերի կրճատումը մեկ տարով է սահմանվել։
Համաձայնությունը ձեռք է բերվել Ճապոնիայի իշխող կուսակցության և ընդդիմության ներկայացուցիչների միջև։ Ամենայն հավանականությամբ, նրանք կուժեղացնեն ջանքերը ՝ Օրենսդիրների աշխատավարձերի մասին օրենքում փոփոխություններ կատարելու համար, որպեսզի աշխատավարձերի կրճատումը հնարավոր լինի արդեն հաջորդ ամսվա սկզբից:
Հավելենք, որ Նոր Զելանդիայում կորոնավիրուսով վարակման 1․386 և մահվան 9 դեպք է գրանցվել։ Ճապոնիայում կորնավիրուսով վարակվածները 8100-ն են, իսկ մահվան ելքերը՝ 146։
Նելլի Մելքոնյան
