13.05.2026 | 20:37
Քրեական ոստիկանները զանգերի անօրինական տերմինացիայի միջոցով ստվերային եկամուտներ ստացող խումբ են բացահայտել
«Փոփոխության սերունդ» կրթական նախաձեռնության շրջանակում Վանաձորի թիվ 3 հիմնական դպրոցում անգլերենի ուսուցման ակումբ է բացվել
Հասարակություն
08.11.2017 | 16:54
Լոռու մարզի Վանաձորի Հ. Թումանյանի անվան թիվ 3 հիմնական դպրոցում բացվել է անգլերենի ուսուցման ակումբ, որտեղ իրականացվելու է անգլերենի ուսուցման լրացուցիչ կրթություն՝ համայնքի 9-16 տարեկան երեխաների համար: Ծրագիրն իրականացվում է Բրիտանական խորհրդի աջակցությամբ՝ «Փոփոխության սերունդ» կրթական նախաձեռնության շրջանակում: Միջոցառմանը մասնակցել է ՀՀ ԿԳ նախարարի տեղակալ Դավիթ Սահակյանը, Բրիտանական խորհրդի հայաստանյան մասնաճյուղի տնօրեն Արևիկ Սարիբեկյանը:
ՀՀ ԿԳ նախարարի տեղակալը ողջույնի խոսքում, առանձնակի կարևորել է հասարակությունը բարեփոխելու գործընթացում կրթության դերակատարումը.«Կրթությունը ճանապարհ է, որը տանում է դեպի լավ ապագա: Ճանապարհներ, գուցե, կյանքում շատ կան, սակայն այս ճանապարհի ամենակարևոր առանձնահատկությունն այն է, որ այն ամբողջությամբ ձեր ձեռքերում է և դուք եք հարթեցնում, բարեկարգում և նորոգում այն: Հայաստանը փոքր է ազգաբնակչությամբ և տարածքով: Ոմանք այն կարծիքն են, դա վատ է, կան նաև կարծիքներ, որ դա առավելություններ ունի: Առավելությունն այն է, որ մենք, փոքրությամբ պայմանավորված, բաց ենք նորություններ ընդունելու, ինչպես նաև մեր մշակույթն ու արժեքները աշխարհին փոխանցելու առումով: Լեզուների, հատկապես անգլերենի իմացությունն այդ ճանապարհին անցնելու արդյունավետ միջոց է: Միջոց, որը մեր առջև դռներ է բացում ոչ միայն մեր մշակույթն աշխարհին ներկայացնելու, այլ նաև աշխարհի շատ ժողովուրդների մշակույթին հաղորդ դառանալու համար: Լինելով ՀՀ քաղաքացի՝ մեր առաջնային խնդիրն է պահել մեր ազգային ինքնությունը, մեր մշակույթն ու լեզուն, գիտակցել դրանց բացառիկ արժեքը՝ միաժամանակ ունենալ աշխարհի համար բաց լինելու գիտակցումը»,- նշել է նա: Շնորհակալություն հայտնելով Բրիտանական խորհրդին և ծրագրի ֆինանսավորման պատասխանատվությունն ստանձնած «Էյջ-էս-բի-սի բանկ Հայաստան» կազմակերպությանը՝ նախարարի տեղակալը խորհրդանշական է համարել փաստը, որ ծրագրի ֆինանսավորումն իրականացրել է ֆինանսական կառույցը. «Կրթության ոլորտի ֆինանսավորումը ոչ թե ծախս է, այլ ներդրում: Եթե նման քայլի գնում է բանկը, որը շատ լավ գիտի ծախսի և ներդրման տարբերությունը, նշանակում է, նա ունի հաշվարկ, որ այդ ներդրումը վերադարձվելու է ոչ թե գումարի, այլ փոփոխված կյանքերի տեսքով: Յուրքանչյուր երեխայի փոփոխված կյանք նպաստում է հասարակության փոփոխությանն ու երկրի բարօրությանը»,- իր խոսքում նշել է Դ. Սահակյանը:
Բրիտանական խորհրդի հայաստանյան մասնաճյուղի տնօրեն Արևիկ Սարիբեկյանը տեղեկացրել է, որ ծրագիրը լինելու է շարունակական՝ ևս 4 մարզերում կբացվեն անգլերենի ակումբներ:
Բացման հանդիսությունից հետո տեղի է ունեցել անգլերենի առաջին բաց դասը, որը վարել է Բրիտանական խորհրդի վերապատրաստում անցած դպրոցի ուսուցչուհին: Նշենք, որ Վանաձորի Հ. Թումանյանի անվան թիվ 3 հիմնական դպրոցի նորաբաց անգելերնի ակումբը «Փոփոխության սերունդ» նախագծի շրջանակում հիմնադրված երկրորդ նմանատիպ կենտրոնն է՝ առաջինը բացվել էր Գեղարքունիքի մարզի Սևան քաղաքի Վ. Կարապետյանի անվան թիվ 3 հիմնական դպրոցում:
