Գնում ենք առաջ, պարտավո՛ր ենք կառուցել մեր ժողովրդի բարեկեցիկ ապագան. Արայիկ Հարությունյան

«2020թ-ի համապետական ընտրական մարաթոնն ավարտված է: Շնորհավորում եմ բոլորիս: Իսկ շնորհավորանքի առիթը բավականին ծանրակշիռ է. պանդեմիայի պարտադրած բարդ պայմաններում մենք բոլորս կարողացանք առանց ցնցումների հաղթահարել քվեարկության 2 փուլերը:

Քվեարկության ակտիվության թեմայով դատողությունները թողնենք քաղաքագետ-վերլուծաբաններին: Իմ կարծիքը հետևյալն է. մեր հայրենակիցների մի մասը` և՛ իմ, և՛ մյուս թեկնածուի կողմնակիցներից, գուցե թե մտածեց, որ ընտրության արդյունքը կանխորոշված է և իր մասնակցությունն այդքան էլ պարտադիր չէ:

Այս ամենով հանդերձ՝ արձանագրում ենք Արցախի Հանրապետության անցումը ժողովրդավարության հաջորդ աստիճանին: Անթերի ոչինչ չի լինում՝ անգամ շատ ավելի կայացած երկրներում: Ժամանակ անց, երբ միջազգային գործընկերները կայցելեն մեր տարածաշրջան, ավելի մոտիկից կկարողանան գնահատել մարդու հիմնական իրավունքների իրացման հանձնառությունը մեզ մոտ ու համեմատել որոշ ճանաչված պետությունների հետ:

Գնում ենք առաջ: Պարտավո՛ր ենք կառուցել մեր ժողովրդի բարեկեցիկ ապագան: Հաջողություն բոլորիս»,- ֆեյսբուքի իր էջում  գրել է Արայիկ Հարությունյանը:

Նշենք, որ «Ազատ հայրենիք» կուսկացության մամուլի քարտուղար Վահրամ Պողոսյանն էլ ֆեյսբուքի իր էջում գրել է. «Արայիկ Հարությունյանն՝ Արցախի Հանրապետության հաջորդ Նախագահ. նախնական արդյունքներն՝ ավելի քան 87 տոկոս. շնորհավորում եմ բոլորիս», ապա քիչ անց հավելել. «Լրատվամիջոցների հարգելի՛ ներկայացուցիչներ: Արցախի Հանրապետության նորընտիր նախագահ Արայիկ Հարությույունյանը վաղը՝ ժամը 12:00-ին, «Արմենիա» հյուրանոցի կոնֆերանս դահլիճում հանդես կգա մամուլի ասուլիսով»: