Որքան պարգևավճար են ստացել իրենց կյանքը վտանգող բուժաշխատողները. ՏԵՍԱՆՅՈՒԹ

Ինչպես աշխարհում, այնպես էլ Հայաստանում առողջապահության ոլորտին մարտահարավեր նետած կորոնավիրուսի դեմ պայքարելու համար բժիշկներն արդեն ամիսներով տուն չեն գնում: Հայ բժիշկների կատարած աշխատանքի մասին գրեթե ամեն օր ֆեյսբուքում լուսանկարներ և տեսանյութեր են հայտնվում: Նրանք շնորհակալական խոսքերի պակաս այս օրերին չեն զգում, բայց սրան զուգահեռ՝ արդյո՞ք բուժանձնակազմը պետությունից արժանապատիվ վարձատրության արժանանում է:

Երեկ ֆեյսբուքում հայտնվեց մի գրառում, որտեղ Երևանի շտապ օգնության կայանի բուժքույր Նազանի Օվականյանն ամոթանք է տալիս վարչապետ Նիկոլ Փաշինյանին՝ այս ծանրաբեռնված օրերին ընդամենը 20 հազար դրամ պարգևավճար ստանալու համար: Բուժքույրն իսկապես 20 հազար դրամ պարգևավճար է ստացել, բայց ինչպես Factor TV-ին փոխանցեց «Շտապօգնության» տնօրեն Թագուհի Ստեփանյանը՝ նա ներգրավված չի եղել կորոնավիրուսով վարակված քաղաքացիներին առաջին օգնություն ցուցաբերելու աշխատանքներում:

«Դա բուժքույր էր, որը չէր տիրապետում ոչ մի ինֆորմացիայի, որը երկու ամիս է՝ չի աշխատում: Նա աշխատում է հոգեբուժական բրիգադում: Ասեկոսեներով հրապարակել էր ինչ-որ մի նյութ»,- ասաց Թագուհի Ստեփանյանը:

Իսկ ահա կորոնավիրուսի դեմ պայքարող շտապօգնության աշխատակիցներին որպես պարգևավճար տրվել է Երևանի քաղաքապետարանի աշխատակազմի եռամսյա պարգևավճարներից` մարտ ամսվա պարգևավճարների ֆոնդը ամբողջությամբ՝ շուրջ 130 միլիոն դրամ:

«Բժիշկները պարգևատրվել են 95 հազար դրամով, բուժքույրերը՝ 70 հազարով, վարորդները՝ նույնպես 70 հազար դրամով: Սա այն բուժանձնակազմն է, որը մարտի 1-ից աշխատել է»,- նշեց նա:

Բացի այս, Թագուհի Ստեփանյանն ասաց, որ ծանրաբեռնված աշխատանքի համար շտապ օգնության կայանի միջոցներից պարգևատրվել են նաև 1-03 կարգավարական կենտրոնի զանգերն ընդունած ավագ բժիշկները, բժիշկները և բուժքույերը: Նրանք պարգևատրվել են, համապատասխանաբար, հիսուն, երեսուն և քսան հազար դրամի չափով:

Սակայն շտապ օգնության կայանն արդեն հաջորդ ամիս կորոնավիրուսի դեմ պայքարող բուժանձնակազմին պարգևատրելու համար խնդրի առջև կկանգնի: Կառույցը բյուջեում պարգևատրման միլիոնանոց ֆոնդեր չունի, ինչպես Կառավարությունում, Ազգային ժողովում, ՊԵԿ-ում կամ նախարարություններում: Իսկ թե կորոնավիրուսի դեմ պայքար մղող բուժանձնակազմը մյուս ամիս ինչպես է պարգևավճար ստանալու, կառույցի տնօրենը պատասխան չունի. «Դուք հիմա ինձ այնպիսի հարց եք տալիս… Ես չեմ ֆինանսավորողը»:

Կապանի բժշկական կենտրոնում նույնպես սկսել են բուժել նաև կորոնավիրուսով վարակված քաղաքացիներին: ԲԿ-ի տնօրեն Կարեն Մելքոնյանը Factor TV-ին փոխանցեց, որ պետությունից դեռ պարգևատրման լրացուցիչ բյուջե չեն ստացել: Սակայն կորոնավիրուսի դեմ պայքարում ընդգրկված 20 հոգանոց բուժանձնակազմի խրախուսման համար Մայամիից 17-ամյա մի աղջիկ գումար է փոխանցել:

«17 տարեկան աղջնակ, որը բնակվում է ԱՄՆ-ի Մայամի քաղաքում, իր մարդասիրական քայլն է արել և գումար է փոխանցել մեր աշխատակիցներին: Այն մարդկանց, որոնք աշխատել են այդ հիվանդների հետ»,- ասաց Կապանի ԲԿ-ի տնօրենը:

Գյումրու ինֆեկցիոն հիվանդանոցի աշխատակիցները, որոնք պայքարում են կորոնավիրուսի դեմ, աշխատավարձից զատ՝ 100-ից 150 տոկոս հավելավճար կստանան:

«Բոլորը, ովքեր աշխատել են կորոնավիրուսով վարակված հիվանդների հետ, բոլորը ստանալու են 100 և 150 տոկոս»,- ասաց Գյումրու ինֆեկցիոն հիվանդանոցի տնօրենը:

Նրա խոսքով՝ կորոնավիրուսով վարակված հիվանդների բուժման գործում ներգրավված է մոտ 30 աշխատակից: Նրանք աշխատում են երկու խմբով, յուրաքանչյուրը՝ 14 օր: Ըստ տնօրենի՝ այժմ քննարկվում է հաջորդ ամսվանից, պարգևավճարների փոխարեն, բուժանձնակազմի համար սահմանել բարձր աշխատավարձ:

«Մեկ ամիս այսպես է լինելու, որ պարգևավճար լինի, բայց մյուս ամսվանից հստակ աշխատավարձ է լինելու: Կֆիքսվի հստակ աշխատավարձ, և բուժանձնակազմը դա կստանա, էլ պարգևավճար չի լինի»,- ասաց հիվանդանոցի տնօրենը:

Առողջապահության նախարարի մամուլի խոսնակ Ալինա Նիկողոսյանն էլ Factor TV-ին փոխանցեց, որ նախարարության ենթակայության տակ գտնվող բուժհիմնարկների աշխատակիցներին ևս հավելավճարներ են տրամադրվում: Հստակ թվերը նախարարությունը, մեր գրավոր հարցերին ի պատասխան, կփոխանցի մի քանի օրից:

Եզրափակելով՝ նշենք, որ վերջերս քննարկման թեմա էր դարձել բարձրաստիճան պաշտոնատար անձանց բարձր պարգևավճարների չափը: Եվ մինչ ֆեյսբուքում ԱԺ փոխնախագահ Լենա Նազարյանը մեկնաբանել էր, որ նախարարին  500 հազար դրամ աշխատավարձ վճարելը շահագործում է, համեմատելու համար նշենք, որ կորոնավիրուսով հիվանդին տեղափոխող և վարակման ռիսկի բարձր խմբում գտնվող շտապօգնության բժիշկն ընդամենը 95 հազար դրամ հավելավճար է ստանում:

Մանրամասները՝ տեսանյութում:

Նարեկ Կիրակոսյան