10.09.2026 | 17:01
1.45 մլրդ դրամ՝ Գյումրու թիվ 2 պոլիկլինիկայի հիմնանորոգման համար
«Սպայկա՞ն» է, արդյոք, ծաղկակաղամբի գինը գցում. «Փաստ»
07.11.2017 | 09:22
«Փաստ» օրաթերթը գրում է.
Շուկայում ծաղկակաղամբի գինը կտրուկ նվազել է: Արմավիրի մարզում գտնվող «Մեհմանդար» կոչվող մեծածախ շուկայում այսօր ծաղկակաղամբի կիլոգրամը 150 դրամով է վաճառվում: Մեկ–երկու շաբաթ առաջ այն իրացվում էր 300 դրամով:
Գյուղացիները «Փաստ» օրաթերթի հետ զրույցում բողոքեցին, որ գինն արհեստականորեն է նվազել: Նրանք պատմեցին, որ օրեր առաջ Ռուսաստանի Դաշնություն արտահանվող ծաղկակաղամբը հետ է եկել: Այն շուկայում 150 դրամով են վաճառել: Իրենք էլ ստիպված ապրանքի գինը գցել են:
«Մենք չգիտենք՝ ի՞նչ տեղի ունեցավ: Խաղ էր, ինչ էր, որ ծաղկակաղամբը հետ բերեցին ու էժան ծախեցին: 20 տոննա բարձած ֆուռը եկավ կանգնեց»,– ասաց առևտրականը:
Այս սեզոնին ծաղկակաղամբ արտահանել է «Սպայկա» ընկերությունը և ևս մի քանի անհատ ձեռներեցներ: Ներկայում «Սպայկան» գյուղացիներից կիլոգրամը 200–250 դրամով ծաղկակաղամբ է ընդունում, բայց հատընտիրները:
«Մեհմանդարի» առևտրականների կարծիքով՝ այս ամենի պատճառը մենաշնորհն է: Անհատ ձեռներեցները չեն կարողանում ապրանք արտահանել:
«Խոշոր խաղացողը «Սպայկան» է: Նա այնպես է անում, որ անհատները այստեղից չկարողանան ապրանք տանել, ու ռուսական շուկայում միայն ինքը խաղա: Այնտեղ էլ խոչընդոտում են ու մեզ համար անհասկանալի պատճառներով ֆուռերը հետ են գալիս: Մեզ համար անհասկանալի է՝ ինչո՞ւ բոլոր ֆուռերը չեն կարողանում Ռուսաստան հասնել»,– բողոքեցին նրանք:
Նախորդ տարիներին գյուղացին կանգնած էր ծաղկակաղամբի իրացման առջև: Այդ հանգամանքն էլ հաշվի առնելով հողագործն այս տարի շատ չի մշակել: Ստացած բերքը կարողացել է բարձր գներով սպառել:
«Արտահանող այս տարի մեզ մոտ չի եկել, բայց կարողանում ենք իրացնել: Բերքը քիչ է՝ խնդիրներ չունենք»,– ասաց Արմավիրի մարզի Հովտամեջ համայնքի բնակչուհին:
Նորապատ համայնքում հիմնականում ձմերուկ ու ծաղկակաղամբ են մշակում: 90 հեկտար ցանքատարածություն ծաղկակաղամբն է զբաղեցնում: Այստեղ նույնպես բողոքում են բերքի ցածր գներից:
«Մի արանք շատ լավ էր՝ գինը բարձր էր, հետո՝ իջավ: Ասում են՝ դուրս չեն թողնում տանել, դրա համար շուկայում լճացում առաջացավ: Երկու օր առաջ 100 դրամով եմ վաճառել»,– փաստեց Նորապատի բնակիչ Աշոտ Բարեղամյանը:
Մանրամասները՝ թերթի այսօրվա համարում:
