18.10.2026 | 12:08
Լիտվայում և Լատվիայում երկնքում անհայտ օբյեկտի պատճառով օդային տագնապ է հայտարարվել
ԱՄՆ կոնգրեսական Ֆրանկ Փալոնը կոչ է արել դադարեցրել Ադրբեջանին տրվող ռազմական օգնությունը․ ANCA
Քաղաքականություն
01.04.2020 | 14:57
ԱՄՆ Կոնգրեսի հայկական հարցերով հանձնախմբի համանախագահ Ֆրանկ Փալոնը կոչ է արել անհապաղ դադարեցնել Ադրբեջանին տրվող ռազմական օգնությունը՝ Հայաստանի և Արցախի դեմ Ադրբեջանի նախագահ Իլհամ Ալիևի ռեժիմի շարունակական գրոհների պատճառով: Այս մասին տեղեկանում ենք ԱՄՆ Հայ դատի հանձնախմբի (ANCA) պաշտոնական կայքից։
Փալոնը հորդորել է կառուցողական մոտեցում ցուցաբերել ՝ ուղղված Արցախի և Հայաստանի դեմ ադրբեջանական ագրեսիայի դադարեցմանը՝ կասեցնելով Ադրբեջանին տրվող ռազմական օգնությունը, խստացնելով Բաքվին տրամադրվող «սահմանային ծառայությունների» օգնության վերահսկողությունը և ավելացնելով Հայաստանին տրվող ռազմական օգնության չափը։
«Միացյալ Նահանգները պետք է անհապաղ դադարեցնի Ադրբեջանին տրվող ռազմական օգնությունը այնքան ժամանակ, մինչև տեղի կառավարությունը կդադարեցնի հարձակումները Հայաստանի և Արցախի դեմ, կհամաձայնի տարածաշրջանային հակամարտությունների խաղաղ լուծմանը և կապացուցի, որ դադարեցրել է մարդու իրավունքների ոտնահարումը»,- հայտարարել է կոնգրեսականը։
Նրա խոսքով՝ պետք է ձգտել ավելի աջակցող ազդակ ուղարկել տարածաշրջանային այն գործընկերներին, որոնք, ինչպես Հայաստանը, ապրում են ժողովրդավարական փոխակերպումներ, ուժեղացնելով երկրների միջև ռազմավարական համագործակցությունը:
Հայ դատի հանձնախմբի (ANCA) գործադիր տնօրեն Արամ Համփարյանը շնորհակալություն է հայտնել ԱՄՆ կոնգրեսականին ՝ այն աշխատանքի համար, որը նա տանում է ԱՄՆ կողմից Ադրբեջանին տրվող ռազմական օգնությունը դադարեցնելու հարցում։ Ըստ նրա՝ ռազմական օգնությունը միայն հզորացրել և ոգևորել է Ադրբեջանին ՝ խթանելու Հայաստանի և Արցախի դեմ տարվող ագրեսիան:
ԱՄՆ Հայ դատի հանձնախմբի կայքում նշվում է նաև ադրբեջանական կողմի՝ մարտի 30-ին ձեռնարկած դիվերսիոն ներթափանցման փորձի մասին, ինչի ընթացքում հակառակորդը կրակահերթ էր բացել Տավուշի մարզի Նոյեմբերյանի շրջանի հայկական դիրքերի ուղղությամբ: Հոդվածում նշվում է նաև Բաղանիս և Ոսկեվան գյուղերի թիրախավորումը, ինչի հետևանքով Ոսկեվանում դպրոցահասակ երեխան վիրավորում էր ստացել:
Նելլի Մելքոնյան
