Համաճարակի պայմաններում առանց ձեռնոցի, դիմակի, մի քանի հոգով կանաչապատում են իրականացնում

Այսօր Factor.am-ը ահազանգ է ստացել, որ Կոմիտաս վարչական շրջանի Գյուլբենկյան փողոցում Երևանի քաղաքապետարանի կանաչապատման բաժնի աշխատակիցները՝ շուրջ տասը հոգով, առանց ձեռնոցի, առանց դիմակի / բացառությամբ մեկ հոգուց/ ծառերի էտման աշխատանքներ են իրականացնում։
Նշենք, որ այս օրերին կորոնավիրուսի համաճարակի հետևանքով հայտարարված արտակարգ դրության պայմաններում պարետատունը հայտարարել է, որ երկու հոգուց ավելի միեւնույն վայրում գտնվել չի կարելի, անգամ տաքսիներից օգտվելիս մեքենայում պիտի լինի վարորդը և ևս մեկ անձ։ Հակառակ դեպքում արտակարգ դրության կանոնները խախտելու համար կտուգանվեն։
Սակայն այս ֆոնին կանաչապատման բաժնի աշխատակիցները, որոնք պետական հիմնարկի ենթակայության տակ են, կորոնավիրուսի «դեմ են դուրս եկել» առանց պաշտպանիչ միջոցների եւ խմբով։
Մեզ ահազանգած քաղաքացին խնդրի մասին տեղյակ է պահել նաև պարետատանը՝ զանգահարելով թեժ գծին։

Փորձեցինք հարցի հետ կապված մեկնաբանություն խնդրել քաղաքապետի խոսնակ Հակոբ Կարապետյանից, որն ասաց, թե սեզոնային աշխատանքները հետաձգել չեն կարող․ «Քաղաքապետը ինչպես օրեր առաջ, այնպես էլ երեկ իր ուղերձում ասաց, որ քաղաքապետարանի ենթակայության տակ գործող հիմնարկները և քաղաքապետարանի բուն համակարգի աշխատակիցները արտակարգ դրության պայմաններին հնարավորինս համապատասխան են աշխատանքներ իրականցնելու, սակայն հասկանալի է, որ հատկապես այն աշխատանքները, որոնք սեզոնային բնույթ են կրում, հետաձգել հնարավոր չէ։ Դրանք արվում են հիմա, արվում են ամենօրյա ռեժիմով և բնական է, որ պիտի պահպանվեն որոշակի կանոններ։ Սա վերաբերվում է նաև այս սեզոնին իրականացվող կանաչապատման աշխատանքներին։ Եթե այս օրերին քաղաք դուրս գալու առիթ ունենանք, կտեսնենք, որ այդ մարդիկ շատ ակտիվ աշխատում են։ Ամեն դեպքում այդ աշխատակցիներին հորդորվել է հնարավորինս պահպանել կարանտինի ռեժիմից բխող պահանջները»։

Կարապետյանը վստահեցրեց, որ իրենք իրենց բոլոր աշխատակիցներին տրամադրել են պաշտպանիչ միջոցներ։ Նա նաև ասաց, որ կանաչապատման աշխատանքները ենթադրում են այնպիսի գործեր, որոնք մեկ հոգով հնարավոր չէ իրականացնել, ինչպես, օրինակ, ծառահատումը, էտումը, տնկումը։

Մեր կողմից նկատենք, որ ծառերի էտումը, ինչի մասին կոնկրետ այս դեպքում խոսք է գնում, հնարավոր է իրականացնել փոքր ինչ-ավելի ուշ, կամ էլ այս սեզոնին առհասարակ չանել։ Դրանից, հաստատ, այդ ծառերը չեն չորանա։ Իսկ այ համաճարակի պայմաններում մարդկանց կյանքը ոչ կենսական անհրաժեշտության համար վտանգելը կարող է շատ ծանր հետեւանքներ ունենալ։

Լիլիթ Շաբոյան