14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Կարելի՞ է կարանտինի ժամանակ դրսում հագուստ չորացնել. վիրուսաբանը պարզաբանում է
27.03.2020 | 19:21
Նոր կորոնավիրուսի տարածման վերաբերյալ այս օրերին տարբեր տեսակետներ են հնչում։ Դրանց շարքում է նաև կարծիքը, թե կորոնավիրուսը կարող է հագուստի միջոցով փոխանցվել։ Թեմայի շուրջ Factor.am-ը զրուցել է վիրուսաբան Հովակիմ Զաքարյանի հետ։
«Սովորաբար, վիրուսը մակերեսների վրա կարող է մի քանի ժամ պահպանվել։ Դրա համար, հավելյալ անվտանգությունից ելնելով, լավ կլինի օգտագործած իրերն ախտահանիչներով լվանալ։ Սակայն փաստ չէ, որ այդպես չանելու դեպքում լուրջ խնդիր կարող է առաջանալ»,- ասաց Հովակիմ Զաքարյանը։
Վիրուսաբանի խոսքով՝ ավելի տրամաբանական է հագուստն անմիջապես լվանալ մարդաշատ վայրեր այցելելուց և մարդկանց հետ շփվելուց հետո։
«Եթե ուղղակի դատարկ փողոցով քայլում եք, ոչ մեկի չեք հանդիպում, ոչ մեկի հետ չեք շփվում, իմաստ չունի հագուստն անմիջապես լվանալ»,- հավելեց մասնագետը:
Հովակիմ Զաքարյանն անդրադարձավ նաև այս օրերին հագուստը դրսում չորացնելու կամ հայերի մոտ ընդունված՝ «լվացք փռելու» հնարավոր վտանգներին:
«Դա ընդհանրապես խնդիր չէ, որովհետև վիրուսային մասնիկները բավականին ծանր են և, կաթիլների միջոցով, շատ արագ նստում են մակերեսների վրա։ Դրանք չեն հասցնում 2 մետրից ավելին գնալ, այնպես որ ՝հագուստը դրսում չորացնելը ոչ մի վտանգ չի ներկայանում։ Վիրուսը չի կարող օդով բարձրանալ ու հագուստի վրա նստել։ Նույնիսկ այն դեպքում, երբ մարդը շփվում է վարակակրի հետ, բայց պահում է սահմանված հեռավորությունը՝ առնվազն 2 մետր, վարակվելու հավանականությունը շատ ցածր է»,- ասաց Զաքարյանը։
Վիրուսաբանը հավելեց, որ այս օրերին, երբ մարդիկ ողջ օրը տանն են, կարևոր է սենյակները հաճախակի օդափոխելը, ինչպես նաև մակերեսներն ախտահանիչ լուծույթներով (սովորական սպիրտով կամ ժավելի սպիրտով) մաքրելը։
Նելլի Մելքոնյան
