Վարչապետի ներկայացրած վիճակագրության հակառակ երեսը

ՀՀ վարչապետ Կարեն Կարապետյանը նոյեմբերի 2-ի ասուլիսում ամփոփելով տարին՝ նշեց, որ իրենց հարցումները ցույց են տալիս, որ ժողովրդի վիճակը լավացել է: Հարցումները համադրեց վիճակագրությանը՝ նշելով. «Սոցիալական մեր հարցումները ցույց են տալիս, որ 2016-ի սեպտեմբերի նկատմամբ բարեկեցության աճ ունեցող քաղաքացիների մեջ տեսել ենք աճ 4 տոկոսի չափով՝ 8.8 տոկոսից դառնալով 12.6: Վիճակի վատացում զգացող քաղաքացիների թիվը նվազել է մոտ 8 տոկոսով՝ 37.2-ից իջնելով 29.3-ի: Մենք ունենք մարդատար ավտոմեքենաների թվերի աճ ավելի քան երկու անգամ»:

Որ բնակչության բարեկեցության մասին բոլորովին չի խոսում մեքենաների ներկրման պատկերը՝ ասաց պետական եկամուտների կոմիտեի նախագահ Վարդան Հարությունյանը հոկտեմբերի 4-ի ասուլիսում. «Այս տարի մեքենաների ներկրումը նախորդ տարվա համեմատ հարյուր տոկոսով ավելացել է: Այս տարի ներկրվել է 21 հազար մեքենա, որոնց թվում ԵԱՏՄ-ից ներկրված մեքենաները շատ փոքր տոկոս են կազմում։ Հիմնականում երրորդ երկրներից է ներկրումը։ Իսկ ներկրված մեքենաների մեծ մասը` 21 հազար ներկրված մեքենաների գրեթե 18-19 հազարը մինչև հինգ հազար դոլար արժողության են»:

Մի շարք պետություններ հայտարարել են 2020-ական թվականների երկրորդ կեսին բացառապես էլեկտրոնային մարտկոցներով աշխատող մեքենաների անցման մասին: Հնամաշ, բենզինով, դիզելով աշխատող մեքենաներից հրաժարվում են մի շարք երկրներ և մթնոլորտի համար խիստ վտանգավոր ավտոմեքենաներն էժան գնով մաքրում են երկրից: Հայաստանի քաղաքացիների ճնշող մեծամասնությունն էլ, չունենալով միջազգային միջին գներով մեքենա պատվիրելու հնարավորություն, գնում է մաշված մեքենաները՝ Հայաստանը դարձնելով ավտոմեքենաների գերեզմանոց: Եվ եթե ավտոմեքենաների շատացմամբ պայմանավորում ենք բնակչության բարեկեցությունը, ուրեմն պետք է փաստել, որ բարեկեցիկ է 21 հազարից ընդամենը 2 հազարը: