ԶԼՄ-ների սահմանափակումների մասին խոսելն ու անհանգստանալն անտեղի է. Ալեն Սիմոնյան

Այսօր երեկոյան տեղի ունեցավ ԱԺ «Իմ քայլը» խմբակցության նիստը, որ սովորաբար կազմակերպվում է քառօրյա նիստերից առաջ։ Նիստին քննարկվել են կորոնավիրուսի և ԶԼՄ-ների լուրերի սահմանափակումների վերաբերյալ հարցեր։ Այդ մասին նիստից հետո լրագրողներին հայտնեց ԱԺ փոխնախագահ Ալեն Սիմոնյանը:

Նա նշեց, որ պարետատունն աշխատում է կորոնավիրուսը կանխարգելելու ուղղությամբ, քննարկվում են տարբեր հնարավոր սցենարները:

Անդրադառնալով լուրերի հրապարակման սահմանափակումների վերաբերյալ ԶԼՄ ներկայացուցիչների դժգոհություններին՝ Սիմոնյանն ասաց. «Այսօր իշխանությունն այնքան բաց է, ինչը որևէ մեկի մոտ կասկած չի առաջացնում: Սահմանափակումների մասին խոսելն ու անհանգստանալն անտեղի է: Խոսքը միայն այն սահմանափակումների մասին է, որը վերաբերում է կորոնավիրուսին: Ունենք դեպք, որ ադրբեջանցի հաքերները կոտրել են հայ օգտատիրոջ էջը և փորձել են խուճապ տարածել: Ցենզուրան վերաբերում է կորոնավիրուսին, դրա հետ կապված իշխանությունն ամբողջ ինֆորմացիան րոպեների ընթացքում տեղեկացնում է հանրությանը: Կարծում եմ, որ անհանգստությունը մի քիչ ուռճացված է: Կարող եմ ասել՝ Հայաստանն այսօր մտնում է այն երկրների շարքի մեջ, որոնք ինֆորմացիոն առումով ամենաբացն են»:

Խոսելով ԱԺ-ում ԲՀԿ ղեկավար Գագիկ Ծառուկյանի այն հայտարարության մասին, թե աշխատակիցներին հարկադիր պարապուրդի ուղարկելու համար պետությունը պետք է փոխհատուցում տրամադրի, Սիմոնյանն ասաց՝ կարծում է, որ թե՛ պարոն Ծառուկյանի, թե՛ իր, թե՛ որևէ մեկի պարագայում քաղաքական մեկնաբանություններ անելը և հիմա գնահատականներ շռայլելը սխալ է, որովհետև աշխարհը նման իրավիճակ չի ունեցել:

Ըստ Սիմոնյանի՝ նույնիսկ Անգլիայի վարչապետն է հայտարարություն անում, որը հետագայում նոր ինֆորմացիայի գալուն պես մեկ այլ գործողության է բերում: Նրա խոսքով՝ սխալ կլինի շտապել խոսել Գագիկ Ծառուկյանի կամ որևէ այլ քաղաքական գործչի քաղաքական գնահատականների մասին։

Մերի Մարտիրոսյան