Խոշոր տուգանքներ ու մինչև անգամ ազատազրկում․ ի՞նչ է լինում, երբ աշխարհում եւ ՀՀ-ում #ՏանըՉենՄնում. ՏԵՍԱՆՅՈՒԹ

Տուգանք կամ կալանք բոլոր նրանց համար, ովքեր արտակարգ դրության պայմաններում կխախտեն կարանտինի կանոնները և կվարակեն այլ անձանց։ Ազգային ժողովն այսօր երկրորդ ընթերցմամբ ընդունեց Վարչական իրավախախտումների վերաբերյալ օրենքում և Քրեական օրենսգրքում լրացումներ կատարելու նախագծերը։

Այսպիսով՝ մեկուսացման կամ ինքնամեկուսացման կանոնները խախտելու համար քաղաքացին կտուգանվի 100-250 հազար դրամով։ Անզգուշությամբ այլ անձի վարակելու դեպքում տուգանքի չափը կկազմի 300-500 հազար դրամ կամ կալանք՝ առավելագույնը 1 ամիս ժամկետով։ Իսկ արդեն երկու կամ ավելի անձանց վարակելու պարագայում՝ քաղաքացին կամ կվճարի կես միլիոնից մինչև 700 հազար դրամ տուգանք, կամ կկալանավորվի 1-3 ամսով, կամ էլ կազատազրկվի մինչև 2 տարով։

Վարակման հետևանքով մարդու մահվան առաջացումը կպատժվի 2-4 տարի ազատազրկմամբ։ Սա Հայաստանում, որտեղ նոր կորոնավիրուսի հաստատված դեպքերը 194-ն են, իսկ մահվան դեպքեր առայժմ չեն գրանցվել։ Իսկ ինչպե՞ս են կորոնավիրուսի տարածման կանոնները խախտողներին պատժում այլ երկրներում։ Իտալիայում, որտեղ կորոնավիրուսի ամենախոշոր եվրոպական բռնկումն է՝ 47.021 վարակակրով և 4032 մահվան դեպքով, պարտադիր մեկուսացման կանոնները խախտելու համար երեք ամսվա ազատազրկում կամ 206 եվրո տուգանք է սահմանված։ Իտալական Լոմբարդիայում, որտեղից կորոնավիրուսը երկրում տարածվել էր, տուգանքի չափը մինչև 5000 եվրո է կազմում։ Իտալիան նման կերպ արդեն ավելի քան 50․000 մարդու է տուգանել: Արտակարգ դրության պայմաններում Իտալիայում արգելված են հուղարկավորություններն ու հարսանյաց արարողությունները, երեկոյան 6-ից հետո հաստատությունները բաց պահելը, ինչպես նաև քաղաքացիների տեղաշարժը` առանց համապատասխան ձևաթղթի, որի մեջ նշված է տանից դուրս գալու հիմնավոր պատճառը։ Սա համարվում է Իտալիայի պատմության մեջ սահմանադրական իրավունքների ամենամեծ ճնշումը։

Վարակվածների թվով Իրանին գրեթե հավասար ԱՄՆ-ում կարանտինի խախտման համար տուգանքի տարբեր սահմանաչափեր կան՝ կախված նահանգից։

Սերբիայում մեկուսացման կարգի խախտումները կարող են արժենալ մինչև 150․000 դինար, այսինքն՝ շուրջ 1300 եվրո։ Խախտումը կրկնելու դեպքում՝ քաղաքացին կարող է մինչև 3 տարվա ազատազրկման դատապարտվել։ Այստեղ կորոնավիրուսով վարակման 135 դեպք կա։ 70 վարակակիր ունեցող Ալբանիայում արտակարգ դրության մասին օրենքով սահմանված է մինչև 83․000 եվրո տուգանք ՝ կորոնավիրուսի դեմ պայքարի միջոցառումների խախտման համար: Օրինակ՝ սոցիալական, մշակութային կամ քաղաքական հավաքները փակ կամ բացօթյա տարածքներում կարող են մինչև 40․000 եվրո տուգանքի պատճառ դառնալ:

Ալբանիայի հեռուստաընկերություններում արգելվել է նույն տաղավարում երկուսից ավելի հյուր ունենալ։ Սրա տուգանքի չափը մինչև 8300 եվրո է։ Արգենտինայում, որտեղ վերջին տվյալներով 158 վարակակիր կա, իրավասու մարմինների կողմից համաճարակի դադարեցմանն ուղղված միջոցառումների խախտման համար 6 ամսից մինչև 2 տարի ժամկետով կալանք է նախատեսված։

Կորոնավիրուսի 41 վարակակիր ունեցող Ուկրաինայում կարանտինային կանոնների խախտումների համար տուգանքներ են սահմանվել ՝ 17-ից մինչև 34 հազար գրիվնայի կամ 580-1160 եվրոյի չափով։

Հարևան Վրաստանում, որտեղ նույնպես Արտակարգ դրություն է հայտարարված, իսկ վարակակիրների թիվը 43 է, մեկուսացման կանոնների խախտման տուգանքը ֆիզիկական անձանց համար 3000 լարի է կամ շուրջ 880 եվրո, իսկ իրավաբանական անձանց համար` 15․000 լարի կամ գրեթե 4400 եվրո։ Կրկնվող իրավախախտումները կհանգեցնեն քրեական պատասխանատվության, մասնավորապես՝ ազատազրկման՝ առավելագույնը 3 տարի ժամկետով։

Մանրամասները՝ տեսանյութում։

Նելլի Մելքոնյան