Վիգեն Սարգսյանը նախընտրական փուլում մասնակցե՞լ է Սեյրան Օհանյանի դեմ «տեղեկատվական տեռորին». ՕՐՕ դաշինքի տեղեկատվական թիմի անդամը՝ Վիգեն Սարգսյան-Ռուզաննա Խաչատրյան «հակամարտության» մասին

Պաշտպանության նախկին նախարար Սեյրան Օհանյանի կինը՝ Ռուզաննա Խաչատրյանը, այս օրերին երեք գրառում է կատարել, որոնք ուղղված են բանակում չծառայած պաշտոնյային, որն ինքը ծառայությունից ապօրինի խուսափելով՝ տարբեր ամբիոններից մատը թափահարելով փորձում է դաստիարակչական խրատներ տալ մատաղ սերնդին: Այսօր կատարած վերջին գրառման մեջ Խաչատրյանը էլ ավելի է բացել փակագծերը. «…Խրամատ պահողը ծանր վնասվածքից ապաքինվեց, «կաբինետչիկը» ֆեյսբուքյան գրառումից վախճանվեց… »:

Նշենք, որ Ռուզաննա Խաչատրյանի Ֆեյսբուքյան գրառումներին, այս օրերին արձագանքել է միայն Պաշտպանության նախարար Վիգեն Սարգսյանի խոսնակը: Քաղաքագետ Երվանդ Բոզոյանը, ով Սեյրան Օհանյանի առաջնորդած ՕՐՕ դաշինքի մաս կազմող «Համախմբում» կուսակցության տեղեկատվական թիմի համակարգողներից էր, խոսելով այս տեղեկատվական պատերազմի մասին՝ ասաց՝ չի ցանկանում միջանձնային հարաբերություններին խառնվել, բայց փաստեց՝ հասարակության բացասական վերաբերմունքը երևում է այդպիսի վեճերում:

Ռուզաննա Խաչատրյանը իր գրառման մեջ նաև նշել էր, թե բանակում չծառայած այդ պաշտոնյան է եղել նաև իր ամուսնու և իրենց ընտանիքի դեմ իրականացված «տեղեկատվական տեռորի» մասնակիցներից մեկը : Factor.am-ը հետաքրքրվեց՝ արդյոք նախընտրական շրջանում, երբ Երվանդ Բոզոյանը «Համախմբում» կուսակցության տեղեկատվական թիմում էր աշխատում, նկատել է տեղեկատվական գրոհ ընդդեմ Սեյրան Օհանյանի ընտանիքի, և արդյո՞ք ունի տեղեկություն՝ Վիգեն Սարգսյանը Ռուզաննա Խաչատրյանի նշած «տեղեկատվական տեռորի» հետ առնչություն ունի, թե ոչ. «Անկեղծ ասած՝ տեղեկություն չունեմ՝ Վիգեն Սարգսյանը կոնկրետ ինչ-որ ակունքներում եղել է, այդ ամենի հետ կապ ունեցել է, թե ոչ, բայց պարզ էր, որ նախընտրական օրերին «Համախմբում» կուսակցությունը թիրախավորված էր իշխանության կողմից»:

Մանրամասները՝ տեսանյութում:

Լիլիթ Շաբոյան