«Մեր ազգն էսպիսի՞ բաներ է տեսել». Սերգեյ Դանիելյանը խուճապ չի նկատում

«Հայաստանում կորոնավիրուսով պայմանավորված խուճապ չեմ նկատում: Օրերս Միացյալ Նահանգներում էի, և կարող եմ ասել, որ այնտեղ ավելի մեծ էր տագնապը: Մեր ազգն էսպիսի՞ բաներ է տեսել…»,- Factor.am-ի հետ զրույցում նշեց դերասան Սերգեյ Դանիելյանը:

Նրա խոսքով՝ այս օրերին պետք է հնարավորինս սատարել իշխանություններին. «Ասում են, որ, օրինակ, եթե Իտալիայի հետ սահմանը ժամանակին փակեին, լավ կլիներ…Ունենք այն, ինչ ունենք: Եթե նույնիսկ արվել են սխալներ, կարծում եմ, միտումնավոր չեն արվել»:

Դերասանը կոչ արեց՝ կարիք չկա թիրախավորելու նաև միմյանց. եթե որևէ մեկն ակամայից դարձել է վարակակիր, չի կարելի նրան հոգեբանական ծանր վիճակի հասցնել: Սերգեյ Դանիելյանը շեշտեց՝ չի զարմանա, եթե այս օրերին նախորդ իշխանությունների ներկայացուցիչները փորձեն քաղաքական դիվիդենտներ շահել:

«Լսել եմ, որ մանկապարտեզներում պահեստավորված սնունդը տրամադրվելու է անապահով ընտանիքներին. նախորդների օրոք այսպիսի բան հնարավոր չէր, պարզապես կգողանային այդ սնունդը»,- ասաց նա:

Ի դեպ, դերասանը հիմա ինքնամեկուսացվել է, հաճախ լինում է գյուղում, զբաղվում է տնտեսությամբ և տան գործերով:

Հիշեցնենք, որ այս պահին Հայաստանում հաստատված է կորոնավիրուսի 102 դեպք: «Հիմա վարակվածների թիվը 102 է, բայց կա առանձնահատկություն: Այս 102 հոգու 75 տոկոսը երկու աղբյուրից են՝ առաջին աղբյուրը Էջմիածնի միջադեպի հետ կապված մարդիկ են, երկորդը՝ արտադրամասի հետ կապված»,- «Շանթ» հեռուստաընկերության ուղիղ եթերում ասել է ՀՀ վարչապետ Նիկոլ փաշինյանը:

Աննա Բաբաջանյան