Ընտանեկան բռնությունը կանխարգելող օրինագծի հետ կապված ՀՀԿ-ի մեծ մասն ունի մտահոգություն. Դավիթ Հարությունյան

Արդարադատության նախարար Դավիթ Հարությունյանի տեղեկացմամբ՝ «Ընտանեկան բռնության կանխարգելման և դրա դեմ պայքարի մասին» օրենքի նախագծի քննարկումների ժամանակ հնչած բուռն մտահոգությունները փարատելու համար նախագիծն այժմ լրամշակվում է, փոփոխվում են որոշակի ձևակերպումներ: Այս մասին այսօր խորհրդարանում լրագրողների հետ զրույցում հայտարարեց ՀՀ արդարադատության նախարար Դավիթ Հարությունյանը:

«Բնականաբար, յուրաքանչյուր օրենքի հետ կապված կարող են լինել տարբեր մեկնաբանություններ, տարբեր հարցադրումներ, և, բնականաբար այս օրենքը, քանի որ արժանացավ բավականին բուռն արձագանքի նաև հանրության կողմից: Օրենքի հիմքը հետևյալն է` օրենքը չի կարող մեկնաբանվել ոչ ողջամիտ: Օրինակ` այս օրենքում նշված էր հետևյալ ձևակերպումը` անձին ազատությունից ապօրինի զրկելը, և տարբեր մեկնաբանություններ հնչեցին, որ եթե երեխային թույլ չենք տալիս տանից դուրս գալ, արդյոք սա անձին ազատությունից ապօրինի զրկել չէ՞ և այլն, և երբեմն այդ քննարկումները հասցվում էին աբսուրդի: Բնական է, եթե այն աստիճան տարածական մեկնաբանվեին նորմերը, իհարկե, աբսուրդ կլիներ օրենքը և կարելի էր ասել՝ նման մեկնաբանության դեպքում օրենքին ոչ մի դեպքում չի կարելի քվեարկել: Ցավոք սրտի, մենք հայտնվեցինք նման իրավիճակում»,- նշեց նախարարը:

Դավիթ Հարությունյանը չհերքեց՝ ՀՀԿ խմբակցության մեծ մասն օրենքի որոշ դրույթների հետ կապված մտահոգություններ ունի:

Մանրամասները՝ տեսանյութում: