02.07.2026 | 02:50
ԱԱ-2026. Բելգիան կամային հաղթանակ տարավ 0:2-ից հետո. ՏԵՍԱՆՅՈՒԹ
Մարդիկ վախենում են գնալ աշխատանքի․ Գևորգ Գորգիսյան. ՏԵՍԱՆՅՈՒԹ
16.03.2020 | 22:39
Աշխատանքի և սոցիալական հարցերի նախարարությանը հանձնարարվել է հետևել, որ այս ընթացքում աշխատողների իրավունքները չխախտվեն: Այս մասին ԱԺ-ում ասաց ՀՀ վարչապետ Նիկոլ Փաշինյանը՝ պատասխանելով ԱԺ ԼՀԿ խմբակցության պատգամավոր Գևորգ Գորգիսյանի հարցին, թե ինչ քայլեր են ձեռնարկվում, որպեսզի չխախտվեն աշխատողների իրավունքները:
«Քաղաքացիների մի մասին մտահոգում է, որ իրենց ասում են՝ եկեք աշխատանքի, իսկ մի մասին էլ մտահոգում է այն, որ իրենց ասում են՝ մի եկեք աշխատանքի: Եվ երկու դեպքում էլ սա անհատական մոտեցման խնդիր է: Եվ ես հանձնարարել եմ Աշխատանքի և սոցիալական հարցերի նախարարությանը, որ գույքագրեն բոլոր իրավիճակները, որ աշխատողների իրավունքները լիարժեք պահպանվեն: Երկրորդ իրավիճակ կարող է լինել, որ մարդն ուզում է վճարի աշխատավարձ, բայց ընկերությունը չունի այդ հնարավորությունները, մենք կարող ենք առաջարկել, որ այդ ընկերությանը վարկային կազմակերպությունը վարկ առաջարկի, որի տոկոսը սուբսիդավորի Կառավարությունը, այսինքն՝ պարտքով փող, որ ինչ-որ ժամանակ հետո վերադարձնելու են, և ամեն խումբ դեպքի համար մենք առաջարկելու ենք կոնկրետ լուծումներ»,- ասաց նա՝ նշելով, որ, ամեն դեպքում, Կառավարությունը կանգնած է տնտեսվարողի կողքին:
Փաշինյանը հավելեց, որ իրավիճակները շատ տարբեր են, և եթե IT ոլորտի աշխատողները կարող են տնից աշխատել, սակայն սուպերմարկետի աշխատողները չեն կարող աշխատանքի չգնալ:
Անդրադառնալով Մոնթե Մելքոնյանի անվան ռազմական ուսումնարանի աշխատակիցների աշխատավարձերի վճարմանը՝ նա նշեց, որ բյուջետային աշխատողները կվճարվեն այս ընթացքում:
Նշենք, որ այսօր ավելի վաղ Կառավարությունն արտահերթ նիստում որոշում է կայացրել ՀՀ տարածքում արտակարգ դրություն հայտարարել: Այս պահին էլ Ազգային ժողովը հատուկ նիստ է հրավիրել՝ քննարկելու արտակարգ դրություն հայտարարելու Կառավարության որոշումը:
Նշենք, որ այս պահին Հայաստանում պաշտոնապես հաստատվել է կորոնավիրուսով վարակվածության 30 դեպք:
Մանրամասները՝ տեսանյութում:
