15.12.2025 | 17:57
Հայաստանը իրավունք չունի վատ հարաբերություն ունենալ որևէ հարևանի ու որևէ գերտերության հետ. Սամվել Կարապետյան
Մինչ քայլարշավի Հայաստան հասնելը հեղափոխություն ունեցանք․ «Գանդի» հիմնադրամի ներկայացուցիչ. ՏԵՍԱՆՅՈՒԹ
Հասարակություն
13.03.2020 | 13:45
«Արդարության և խաղաղության հետքերով» խորագրով «Ջայ Ջագաթ 2020» քայլարշավը Հնդկաստանից հասել է Հայաստան։ «Գանդի» հիմնադրամի հայաստանյան ներկայացուցիչ Արսեն Խառատյանն այսօր լրագրողների հետ հանդիպմանը ներկայացրեց քայլարշավի նպատակն ու երևանյան օրակարգը։
«2 տարի առաջվանից սկսած քննարկում էինք Գանդիի 150-ամյակին սկիզբ առնող, մարդկությունը համախմբելու նպատակով գլոբալ քայլերթը։ Մինչհեղափոխական շրջանում գծում էինք այն ուղին, որով քայլերթը պիտի տեղի ունենար, հատկապես՝ Հայաստանում. ովքեր էին մեր գործընկերները, ում հետ էինք աշխատելու: Այն ժամանակից էլ մեր գործընկերներից էր նաև «Քաղաքացիական պայմանագիր» կուսակցությունը, որի հետ մեր գործընկերները մինչ հեղափոխությունը հանդիպել էին։ Ե՛վ քայլարշավը, և՛ ոչ բռնի մեթոդները, որպես դրական փոփոխությունների հասնելու մեթոդ, քննարկվել էր։ Բայց կարելի է ասել՝ շաբաթն ուրբաթից շուտ եկավ. մինչ քայլարշավի Հայաստան հասնելը հեղափոխություն ունեցանք, և այս իմաստով մեզ համար շատ հեշտ է հիմա այս ամենի մասին խոսելը, քանի որ դրական փոփոխության օրինակ ունենք»,- ասաց Խառատյանը։
Նա նշեց, որ «Ջայ Ջագաթ 2020» քայլարշավի մասնակիցներն առաջիկա 3 օրերին լինելու են Երևանում. «Խումբը՝ 50 մարդ, մարտի 14-ին Էջմիածին է գնալու՝ քայլարշավի, փոքր ուխտագնացություն է լինելու։ Ամսի 16-ին ունենք միջոցառում, փորձելու ենք անցնել քաղաքացիական պայքարի հետքերով։ Մասնակցելու ենք, քայլելու ենք կենտրոնի տարբեր հատվածներում՝ Մատենադարանից՝ 1988-ի շարժման վայրից մինչև «Ազատության» հրապարակ, «Հանրապետության» հրապարակ»։
Նշենք, որ 2019 թվականի հոկտեմբերի 2-ին Նյու Դելիից (Հնդկաստան) մեկնարկեց և առայսօր էլ ընթանում է Հնդկաստանի քաղաքական և հոգևոր առաջնորդ Մահաթմա Գանդիի 150-ամյակին նվիրված «Արդարության և խաղաղության հետքերով» խորագրով «Ջայ Ջագաթ 2020» քայլարշավը:
Մանրամասները՝ տեսանյութում:
