Հասարակություն
10.03.2020 | 16:56
Գյումրիի հաշմանդամների ու տարեցների տուն-ինտերնատի լուծարումը շարունակվում է, գործընթացն արդեն ավարտական փուլում է։
Դեռևս անցյալ տարվա դեկտեմբերի 12-ին, հիշեցնենք, Կառավարությունը որոշել էր լուծարել Գյումրիի տուն-ինտերնատը: Այսուհետ տուն-ինտերնատի շահառուների խնամքն իրականացվելու է պատվիրակման սկզբունքով՝ բարեգործական կամ հասարակական կազմակերպության կողմից։ Գյումրիի տարեցների տուն-ինտերնատի շահառուների խնամքը պետությունը պատվիրակել է Հայկական կարմիր խաչ ընկերությանը։
«Կազմակերպությունը, որն այսուհետ զբաղվելու է Գյումրիի տարեցների տուն-ինտերնատի սպասարկմամբ ու աշխատանքների կազմակերպմամբ, Հայկական կարմիր խաչն է, որի հետ Աշխատանքի ու սոցիալական հարցերի նախարարությունը համապատասխան հուշագիր է ստորագրել։ Ըստ պայմանագրի՝ Հայկական Կարմիր խաչ ընկերությունը 163 մլն դրամի ներդրում է իրականացնելու հաստատությունում, վերանորոգելու է հաստատության 6 բնակելի բլոկները»,- Factor.am-ի հետ զրույցում ավելի վաղ ասել էր աշխատանքի ու սոցիալական հարցերի նախարարի մամուլի խոսնակ Սոնա Մարտիրոսյանը։
Այս պահին Կարմիր խաչը դեռևս պաշտոնապես չի ստանձնել տուն-ինտերնատի սպասարկման աշխատանքները, լուծարային գործընթացն ամբողջությամբ դեռ չի ավարտվել:
«Կառույցի ռեժիմային փոփոխություն եղավ, չի կարող չլինել, լուծարային գործընթաց է։ Մարտի 4-ին կառույցի աշխատակիցները բոլորն ազատվեցին աշխատանքից, նույն օրն էլ գրեթե բոլորն ընդունվեցին աշխատանքի։ Իհարկե՝ եղել են հաստիքներ, որոնք չեն համալրվել՝ հաշվի առնելով երկու ամսվա գործունեությունն ու այդ հաստիքների ոչ արդյունավետությունը: Այս պարագայում գլխավորը հիմնարկի գործունեությունը բնականոն շարունակելն է լուծարային փուլում»,- մեզ հետ զրույցում ասաց «Գյումրիի տուն-ինտերնատի» տնօրենի ժամանակավոր պաշտոնակատար Արմեն Սարուխանյանը։
Հավելենք, որ նախարարության հետ կնքված հուշագրի համաձայն՝ Կարմիր խաչը պարտավորվում է աշխատակիցների հետ վերակնքել պայմանագրերը, ինչն էլ արել է։
«Ընկերությունը պարտավորվել է աշխատակիցների 70 տոկոսի հետ վերակնքել աշխատանքային պայմանագրերը, մասնավորապես՝ այն աշխատակիցների, ում կենսաթոշակային տարիքը դեռևս չի լրացել»,- մեզ ասել էր աշխատանքի ու սոցիալական հարցերի մամուլի խոսնակը։
Արդյունքում երկու-երեք կենսաթոշակային հաստիքներում նոր աշխատակիցների են ընդունել:
«Գլխավոր չափանիշը, ըստ Կարմիր խաչի, աշխատանքի արդյունավետությունն է։ Այս փոփոխության ժամանակ տեղափոխվող կամ դուրս եկած հաստիքները եղան կենսաթոշակային տարիքի։ 72 հաստիքային միավոր կա, որից 70-ը նորից ընդունվել են: Կենսաթոշակային տարիքի աշխատակիցների փոխարեն երիտասարդներ են ընդունվել։ Հիմա երկու հաստիք թափուր է մնացել։ Կփորձենք աշխատել առանց դրա, եթե չստացվեց, նոր աշխատակիցների ընդունելու կարիք կառաջանա»,- ասաց Արմեն Սարուխանյանը։
Հավելենք, որ առայժմ հստակ ժամկետներ չկան, թե երբ վերջնականապես կլուծարվի տուն-ինտերնատն ու գործառույթներն ամբողջովին կփոխանցվեն Հայկական Կարմիր խաչ ընկերությանը:
Էմմա Չոբանյան
