18.12.2025 | 23:24
ՀՀ տարածքում ավտոճանապարհները հիմնականում անցանելի են
Ռոբին Հուդի ֆիլմը ցուցադրելու համար կպատժվե՞ն․ հարց՝ բռնության քարոզը քրեականացնելու վերաբերյալ. ՏԵՍԱՆՅՈՒԹ
Հասարակություն
05.03.2020 | 12:57
Արդյո՞ք Ռոբին Հուդի մասին ֆիլմը ցուցադրելու համար հեռուստատեսության պաշտոնյան կարող է պատասխանատվության ենթարկվել։ ՀՀ քրեական օրենսգրքում փոփոխություն կատարելու մասին նախագծի քննարկման ժամանակ նման օրինակ ներկայացրեց «Իմ քայլը» խմբակցության պատգամավոր Նիկոլայ Բաղդասարյանը:
Նշենք, որ ներկայացված նախագծով առաջարկվում է քրեականացնել բռնության քարոզը։
«Օրինակ՝ հեռուստատեսությամբ ունենք Ռոբին Հուդի մասին ֆիլմ, որտեղ հերոսն ասում է՝ պետք է գնալ, սպանել, և հեռուստաընկերությունը այդ ֆիլմը ցույց է տալիս: Պե՞տք է այդ հեռուստաընկերության պաշտոնատար անձին պատասխանատվության ենթարկել, որովհետև, ըստ էության, նա տարածում է այդ ֆիլմը»,- ասաց պատգամավորը։
Արդարադատության փոխնախարար Սրբուհի Գալյանն արձագանքեց՝ նշելով, որ յուրաքանչյուր դեպքում անձի արարքում պետք է հիմնավորվի մեղքի առկայությունը. «Արդյո՞ք նա նպատակադրված է եղել բռնության քարոզման, արդյո՞ք նրանց նպատակը միտված է եղել որոշակի խումբ անձանց մոտ առաջացնել բռնություն գործադրելու ցանկություն, արդյո՞ք նրանց ցանկացել են բռնության ենթարկված տեսնել X խմբին: Կարծում եմ՝ հարցի պատասխանը «ոչ»-ն է։ Այդ դեպքերը չպետք է դիտարկվեն այս հանցակազմի համատեքստում»:
Մանրամասները՝ տեսանյութում:
