Քաղաքականություն
04.03.2020 | 20:49Factor.am-ը զրուցել է Հայ ազգային կոնգրեսի վարչության անդամ Գրիգոր Ոսկերչյանի հետ
Հայ ազգային կոնգրեսի վարչության անդամ Գրիգոր Ոսկերչյանը Մարտի 1-ի դեպքերին առնչված այն գործիչներից է, որի իրավունքների խախտումը ճանաչել է ՄԻԵԴ-ը, ըստ որի՝ նրան կալանքի տակ պահելու հիմքեր չեն եղել։ 2 տարվա ազատազրկման էր դատապարտվել Ոսկերչյանը իշխանությունը բռնությամբ զավթելու կոչերի մեղադրանքով։
Factor TV-ի հարցազրույցում Գրիգոր Ոսկերչյանը պատմում է, որ Մարտի 1-ը և 10 զոհերը պրոցեսի կուլմինացիոն կետն էր, բայց խնդիրը կեղծված ընտրություններն էին:
«Մինչև ընտրությունները, նախընտրական փուլում շատ մեծ բռնաճնշումներ էին տեղի ունեցել, բազմաթիվ մարդիկ ձերբակալվել էին մինչև Մարտի 1-ի իրադարձությունները՝ Պետրոս Մակեյան, Սմբատ Այվազյան և այլք։ Ամբողջը հետևանք է ընտրությունների կեղծման»,- ասում է Գրիգոր Ոսկերչյանը։
Ըստ նրա՝ մինչև առավոտյան «Ազատության հրապարակի ջարդը, մարդիկ պարզապես սպասում էին Սահմանադրական դատարանի որոշմանը»․ «Իշխանությունները, մինչդեռ չսպասեցին դրան։ ՍԴ-ի որոշ անդամների վրա ճնշումներ էին եղել, դա նկատի ունենալով կարելի է ենթադրել, որ հնարավոր է՝ ՍԴ-ն այլ որոշում կայացներ, քան ցանկանում էր իշխանությունը»։
Մարտի 1-ի լուսադեմին, ըստ Ռոբերտ Քոչարյանի պաշտպանների, Ազատության հրապարակում Ոստիկանությունը ստիպված է եղել ուժ կիրառել, իսկ այս մասին Ռոբերտ Քոչարյանը տեղեկացել է միայն առավոտյան, երբ աշխատանքի է գնացել. «Նախատեսված է եղել գործողություն, որը չէր ենթադրում ուժի կիրառում։ Օրեր շարունակ ստացվում էին օպերատիվ տեղեկություններ, որ հրապարակում հավաքված անձանցից ոմանց մոտ առկա են զենքեր, ընդհուպ մարտական ինքնաձիգեր, մարտական նռնակներ»:
Դեպքերի ականատես Գրիգոր Ոսկերչյանը պատասխանում է․ «Դա կեղծիք է։ Դրա նախօրեին նա համալսարանում ուսանողների հետ հանդիպմանը հասկացրեց, որ պատրաստվում է ուժ կիրառել ցուցարարների նկատմամբ, բաց տեքստով նա այդ մասին խոսեց։ Խեղդվողը փրփուրից է բռնվում։ Հիմա ցանկացած մեթոդի դիմում են»։
Մանրամասները՝ տեսանյութում:
Ռոբերտ Անանյան
