«Պրիզնատ եկեք, որ գիտեք». պաշտոնյան և վարորդները վիճում են. ՏԵՍԱՆՅՈՒԹ

Տուրիստական միկրոավտոբուսների վարորդներն այսօր բողոքի ակցիա էին կազմակերպել Հանրապետության հրապարակում: Նրանք պահանջում են, որպեսզի թույլ տան Հանրապետության հրապարակին հարակից հատվածում շարունակել կայանել իրենց ավտոմեքենաները:

Մինչ այդ, նրանց հայտնել էին, որ եթե իրենց մեքենաները դուրս չբերեն Հանրապետության հրապարակից, տարհանող մեքենաները դա կանեն: Երբ տարհանող մեքենան բերեցին, ակցիայի մասնակիցներն իրենց մեքենաներով շարժվեցին դեպի Երևանի քաղաքապետարանի շենք:

«Մեզ ուղղորդում են մե՛կ քաղաքապետարան, մե՛կ Պետական եկամուտների կոմիտե: Արդեն երեք ամիս է՝ բոլոր տեղերը դիմումներ ենք ներկայացրել: Կառավարությունից մեզ ուղղորդել են քաղաքապետարան, քաղաքապետարանից էլ հստակ պատասխան չեն տվել: Մեզ այլընտրանք էլ չեն առաջարկում, որ ասեն՝ այսինչ տեղը կարող եք կայանել ձեր մեքենաները: Պատրաստ ենք բոլոր հարկերը վճարել, ուզում ենք աշխատել»,-ասացին նրանք:

Ակցիայի մասնակիցներից մեկն էլ ասաց. «Մեզ չեն կարող առաջարկել այնպիսի վայր, որ հարմար չէ: Մեզ ասում են՝ այստեղ չի կարելի կայանել, որովհետև խաչմերուկի է համարվում, բայց այստեղ ոչ մի խաչմերուկի չկա: Մենք առաջարկում ենք, որ մեկ գծով միայն տուրիստական մեքենաները կանգնեն»:

Քաղաքապետարանից նրանց հետ հանդիպման եկավ տրանսպորտի վարչության պետ Էդգար Գալստյանը: Նա նշեց, որ իրենք հիմա քննարկում են, թե քաղաքում որտեղ տեղեր սահմանեն, որպեսզի տուրիստական միկրոավտոբուսների համար հարմար վայրեր գտնեն:

«Խոսքը Երևանի փոքր կենտրոնի մասին է»,-ասաց նա՝ հավելելով, որ քննարկվում է և՛ Սախարովի հրապարակի, և՛ Շահումյան հրապարակի տարբերակը: Վարորդները նշեցին, որ տուրիստները Սախարովի հրապարակ չեն գա: Վարորդների և քաղաքապետարանի պաշտոնյայի միջև վեճ սկսվեց:

Մանրամասները՝ տեսանյութում: