04.04.2026 | 20:03
ՃՏՊ՝ հրդեհի բռնկմամբ
Գագիկ Խաչատրյանի եղբորորդին՝ Կարեն Խաչատրյանը, կշարունակի մնալ կալանավորված
Հասարակություն
02.03.2020 | 18:59
ՊԵԿ ներքին անվտանգության վարչության նախկին պետ Կարեն Խաչատրյանը կմնա կալանավորված։ Երևանի ընդհանուր իրավասության դատարանը, դատավոր Աննա Մաթևոսյանի նախագահությամբ, մերժել է ՊԵԿ ներքին անվտանգության վարչության նախկին պետ Կարեն Խաչատրյանին գրավի դիմաց ազատ արձակելու մասին պաշտպանների միջնորդությունը։ Այս մասին Factor.am-ի հետ զրույցում ասաց պաշտպան Ամրամ Մակինյանը:
«Այս որոշումը սպասելի էր այն մասով, որ ամեն ինչ արվում է, որ Կարեն Խաչատրյանը շարունակաբար պահվի կալանքի տակ։ Գտնում ենք, որ Կարեն Խաչատրյանին կալանքի տակ պահելու իրավական հիմքերը բացակայում են»,- նկատեց պաշտպանը:
Հարցին՝ ո՞ւմ կողմից և ինչի՞ համար է դա արվում, պաշտպանը դժվարացավ պատասխանել։
Հիշեցնենք, որ Կարեն Խաչատրյանը զբաղեցրել է ՊԵԿ Ներքին անվտանգության վարչության պետի պաշտոնը և մեղադրվում է առանձնապես խոշոր չափով վատնում կատարելու համար:
Խաչատրյանը և նրա հորեղբայր Գագիկ Խաչատրյանը, որը եղել է ՊԵԿ նախագահ, ֆինանսների նախարար, ձերբակալվել են 2019-ի օգոստոսի 27-ին, ապա՝ կալանավորվել։ Շուրջ 5 ամիս կալանքի տակ մնալուց հետո Կարեն Խաչատրյանն ազատ էր արձակվել հունվարին, ապա փետրվարի 17-ին Վերաքննիչ դատարանը բեկանել էր նրա նկատմամբ խափանմամբ միջոց գրավը թույլատրելի համարելու Երևանի ընդհանուր իրավասության առաջին ատյանի դատարանի որոշումը։ Նրան կալանքից գրավով ազատելը ճանաչվել էր անթույլատրելի:
