«Կուկուն» դատարան էր եկել․ Պողոս Պողոսյանի սպանության գործով կայացավ դատական նիստ

Վերաքննիչ քրեական դատարանում այսօր մեկնարկեց և կարճ ժամանակ անց ավարտվեց 2001 թվականին «Առագաստ» սրճարանի զուգարանում ՀՅԴ անդամ Պողոս Պողոսյանի սպանության գործով բողոքի քննությունը։

Դատախազությունը պահանջում է նոր երևան եկած հանգամանքների հիման վրա քրեական գործը վերաբացել։ Այսօրվա դատական նիստին ներկա էր Հայաստանի երկրորդ նախագահ Ռոբերտ Քոչարյանի թիկնազորի նախկին պետ Աղամալ Հարությունյանը, որը, հայտնի է «Կուկու» մականվամբ:

Նա այս գործով 2 տարվա պայմանական ազատազրկման էր դատապարտվել՝ անզգույշ սպանության համար։ Նրա պաշտպանը դատարանում առարկեց լրագրողների տեսանկարահանում իրականացնելու դեմ և խնդրեց սահմանափակել այն: Բացի այդ, Աղամալյանի պաշտպանը դատարանից ժամանակ խնդրեց գործի նյութերին ծանոթանալու համար։ Դատական նիստը հետաձգվեց, այն կկայանա մարտի 27-ին։

Դատական նիստի ավարտից հետո, Կուկու մականվամբ հայտնի Աղամալյանը հրաժարվեց պատասխանել լրագրողների հարցերին։ Այս գործը նոր ընթացք ստացավ, երբ ականատեսներից Ստիվեն Նյուտոնը Սահմանադրական դատարանի բակում անցկացվող հանրահավաքի ժամանակ Factor.am-ի հետ զրույցում գործից մի շարք մանրամասներ հաղորդեց։

Ըստ Դատախազության ավելի վաղ տարածած հաղորդագրության՝ գործով ականատես վկաների դիմումների և հարցաքննությունների արդյունքում պարզվել են դեպքի մասին էական նշանակություն ունեցող այնպիսի տեղեկություններ, որոնք առերևույթ վկայում են Պ. Պողոսյանի՝ կյանքից ոչ թե անզգուշությամբ զրկվելու, այլ մի խումբ անձանց կողմից խուլիգանական դրդումներով դիտավորությամբ սպանության մասին. «Այսինքն՝ առերևույթ ի հայտ են եկել այնպիսի նոր հանգամանքներ, որոնք կարող են ապացուցել, որ գործով դատապարտված անձն առերևույթ կատարել է ավելի ծանր հանցանք՝ սպանություն ծանրացուցիչ հանգամանքներում, քան այն, որի համար դատապարտվել է: Բացի այդ, դրանք առերևույթ վկայում են հանցանքի կատարմանը նաև այլ անձանց մասնակցության վերաբերյալ»:

Լիլիթ Շաբոյան