19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Դատավոր Արայիկ Մելքումյանի լիազորությունները վերականգնելու վերաբերյալ որոշումը ԲԴԽ-ն կհրապարակի փետրվարի 27-ին
Հասարակություն
20.02.2020 | 18:09
Բարձրագույն դատական խորհուրդն այսօր քննեց դատավոր Արայիկ Մելքումյանի լիազորությունները վերականգնելու հարցը։ Նիստի ժամանակ նշվեց, որ Մելքումյանը ճանաչվել է սնանկ, և հարց ուղղվեց՝ արդյո՞ք դատավորը, որը սնանկ է ճանաչվել, բանկերի նկատմամբ ունի պարտավորություն, կարող է լինել արդար ու անաչառ դատավոր։
Մելքումյանի ներկայացուցիչը նշեց, որ Դատական օրենսգրքով նախատեսված չէ նման դրույթ, որ եթե դատավորի նկատմամբ կա սնանկության վարույթ, ապա նրա լիազորությունները պիտի դադարեցվեն. «Նման ֆինանսական պարտավորությունները դեռևս չեն ստիպում դատավորին՝ չլինել օբյեկտիվ և անաչառ»։
Նիստի ավարտին հայտարարվեց, որ որոշումը կհրապարակվի փետրվարի 27-ին։
Արայիկ Մելքումյանի ներկայացուցիչը լրագրողների հետ զրույցում նշեց, որ դատավորի լիազորությունների դադարեցումը տեխնիկական բացթողման պատճառով է եղել, ինչն էլ կապված է դատավորի գերծանրաբեռնվածությամբ։
«Արայիկ Մելքումյանի նկատմամբ հարուցվել էր կարգապահական վարույթ այն հիմքով, որ դեռևս օրինական ուժի մեջ չմտած դատական ակտի պայմաններում Արայիկ Մելքումյանը տվել էր կատարողական թերթ։ Նիստի ընթացքում մենք նշեցինք, որ, այո՛, նման իրավիճակ տեղի է ունեցել, բայց դա պայմանավորված է գերծանրաբեռնված լինելով։ Անընդունելի է մի դատավորի վարույթում 3.000-3.500 դատական գործ միառժամանակ ունենալը, և դա անխուսափելիորեն բերելու է տեխնիկական նման խնդիրների»,- նշեց նա:
Դատավորի ներկայացուցիչը նաև ասաց, որ ԲԴԽ-ն, մեկ այլ դատավորի նկատմամբ նմանատիպ դեպք արձանագրելով, ընդամենը սահմանափակվել է խիստ նկատողությամբ, իսկ Արայիկ Մելքումյանի դեպքում լիազորությունների դադարեցումն է ընտրվել. «Մենք կարծում ենք, որ դա պայմանավորված է եղել Արայիկ Մելքումյանի կողմից դեռևս տարիներ առաջ կայացված պետական ակտերով՝ ներկայիս վարչապետի ընտանիքին պատկանող թերթի դեմ: 2009 թվականին Արայիկ Մելքումյանը 3 մլն դրամի տուգանքի վճարման պարտավորություն է տվել այդ թերթին»։
Դատավորի ներկայացուցիչը հավելեց, որ արդեն դիմել են Եվրոպական դատարան, գործընթաց է նախատեսվում։
Հիշեցնենք, որ 2019 թվականի փետրվարին Բարձրագույն դատական խորհուրդը դադարեցրել էր Երևանի ընդհանուր իրավասության դատարանի դատավոր Արայիկ Մելքումյանի լիազորությունները: Վերջինս էլ ԲԴԽ-ի որոշման սահմանադրականությունը վիճարկել է Սահմանադրական դատարանում։ Արդյունքում ԲԴԽ որոշումը ճանաչվել է հակասահմանադրական:
