Լիսկայի երբեմնի թշնամի Սամվել Հարությունյանը նրա «փաստաբանի» դերն է ստանձնել. «Փաստ»

«Փաստ» օրաթերթը գրում է.

90–ականներին Գորիսի քաղաքապետի պաշտոնը զբաղեցրած Սամվել Հարությունյանը որոշել է նոյեմբերին Սյունիքում կայանալիք ՏԻՄ ընտրություններում առաջադրել իր թեկնածությունը: Սամվել Հարությունյանի անունը լրատվամիջոցներում ակտիվորեն սկսեց շրջանառվել 2013 թվականից սկսած: Նա հաճախ հանդես էր գալիս ասուլիսներով՝ Սյունիքի նախկին մարզպետ Սուրիկ Խաչատրյանին և նրա ընտանիքի անդամներին մեղադրելով ծանր հանցագործությունների, թմրամոլության և կաշառակերության մեջ: Սուրիկ Խաչատրյանն անգամ դատի էր տվել Հարությունյանին՝ մեղադրելով իր անձի վերաբերյալ կեղծ տեղեկություններ տարածելու մեջ:

Դատական պրոցեսի ընթացքում իր ասուլիսներից մեկում Հարությունյանը դիմել էր երկրի բարձրագույն իշխանությանը «Սյունիքը Լիսկաթափելու» խնդրանքով: Նա հայտարարում էր, թե «Սուրիկ Խաչատրյանի գերդաստանի արական սեռի գրեթե բոլոր անդամները թմրամոլներ են, Սյունիքում թմրանյութերի գլխավոր տարածողներն են» և ներկայացնում դրվագներ նախկին մարզպետի և նրա որդիների, իր իսկ բնորոշմամբ, հանցագործություններից:

Սակայն 2015 թվականին Սամվել Հարությունյանը անակնկալ կերպով դադարեց խոսել Սյունիքի նախկին մարզպետի մասին: 2017 թվականի սկզբին «Փաստ» օրաթերթի հետ զրույցում Հարությունյանը խոստովանեց, որ 25 տարուց ավելի տևած թշնամանքից հետո հանդիպել է Սուրիկ Խաչատրյանին: «Պայմանավորվել ենք, որ մեր հետագա կյանքում միայն փորձենք դրականի և լավ գործերի առումով օրինակ ծառայել մարդկանց»,–ասել էր Հարությունյանը:

Թե ինչպես էր Հարությունյանի կողմից «հանցագործ» որակվող Սուրիկ Խաչատրյանը օրինակ ծառայելու մարդկանց, այդպես էլ հանելուկ մնաց: Բայց Հարությունյան–Խաչատրյան «հաշտությունը» վերջին շրջանում բավականին ուշագրավ դրսևորումներ է ստացել:

Այսպես. երեկ՝ հոկտեմբերի 25–ին, Սամվել Հարությունյանը հանդես եկավ նախընտրական ասուլիսով և չհերքեց, որ 1,5 տարի առաջ ինքը Սուրիկ Խաչատրյանի առաջարկով է Երևանից Գորիս տեղափոխվել: Սամվել Հարությունյանը հայտարարեց, որ Սուրիկ Խաչատրյանը հաշտվելուց հետո իրեն պետական պաշտոններ է առաջարկել, և ինքը նախընտրել է ղեկավարել Բակունցի անվան գիտամշակութային կենտրոնը, որն ի դեպ ֆինանսավորվում է նախկին թշնամու կողմից:

Երեկվա ասուլիսն աչքի ընկավ մեկ այլ ուշագրավ դրվագով. Սամվել Հարությունյանը սկսեց մեղադրանքներ հնչեցնել Սյունիքի գործող մարզպետ Վահե Հակոբյանի հասցեին և ստանձնեց իր կողմից ոչ վաղ անցյալում «հանցագործ» որակվող Սուրիկ Խաչատրյանի «փաստաբանի» դերը՝ ներկայացնելով նրա օրոք` մարզում կատարված բարեփոխումները խոսելով նախկին մարզպետի դրական հատկանիշների մասին: Տեսարանն, իրոք, հուզիչ էր:

Սամվել Հարությունյանը երեկվա իր հայտարարություններով ակամայից հաստատեց Գորիսում շրջանառվող տեղեկությունները, որ Սյունիքի նախկին մարզպետի մասին իր լռության դիմաց «ինչ–որ բան է ստացել» նրանից և գործող մարզպետի դեմ խոսում է հենց Սուրիկ Խաչատրյանի հրահանգով, քանի որ վերջինս ոչ մի կերպ չի կարողանում հաշտվել, որ իրեն փոխարինող գտնվեց, ով կարողացավ խորհրդարանական ընտրություններում ՀՀԿ–ի համար լուրջ ձայներ ապահովել:

Սամվել Հարությունյանն իր էմոցիոնալ ելույթում խոսում էր սյունեցու ազնիվ տեսակի մասին՝ գուցե չնկատելով, որ հենց իր նման անսկզբունքային մարդիկ են վարկաբեկում սյունեցու անունը: Մարդիկ, ովքեր ունակ են համապատասխան փոխհատուցման դիմաց 380 աստիճանով փոխել իրենց դիրքորոշումը, կեցվածքը և չամաչել դրանից:

Հավելենք, որ 2017 թվականի ապրիլին կայացած խորհրդարանական ընտրություններում Սամվել Հարությունյանը առաջադրվել էր «Ազատ դեմոկրատներ» կուսակցության ցուցակով և շուրջ 100 ձայն էր հավաքել: Թե ինչ արդյունք կգրանցի նա այս անգամ, ցույց կտա ժամանակը:

Մանրամասները՝ թերթի այսօրվա համարում: