«Ինձ սկզբից թվաց, թե Սաշիկն է խփել». հրապարակվեց տուժողի հոր ցուցմունքը. ՏԵՍԱՆՅՈՒԹ

Երևանի ընդհանուր իրավասության դատարանի Շենգավիթի նստավայրում դատավոր Աննա Դանիբեկյանի նախագահությամբ շարունակվում է Սերժ Սարգսյանի եղբորորդու՝ Հայկ Սարգսյանի գործով դատական նիստը։ Այսօրվա նիստում հրապարակվեց գործով տուժող ճանաչված Դավիթ Սիմոնյանի հոր նախաքննական ցուցմունքը, քանի որ նա երկրում չէ և հնարավոր չէր ապահովել վերջինիս ներկայությունը:

«Դավիթ Սիմոնյանը հանդիսանում է իմ որդին։ Ցանկանում եմ նշել, որ մեր ընտանիքը միշտ հասարակական վայրերում նշել է ապրիլի 1-ի՝ սուտ ասելու օրը, և 2007 թվականի ապրիլի 1-ին նույնպես ցանկացել ենք նշել ինչ-որ ռեստորանում։ Ընտանիքով պետք է գնայինք ռեստորան, որի համար էլ զանգահարել ենք Դավիթին, սակայն որևէ մեկը չէր պատասխանում։ Այդպես էլ չգնացինք, քանի որ Դավիթը չպատասխանեց հեռախոսազանգերին։ Ժամը 20:00-ին կրկին զանգեցինք Դավիթին, հեռախոսազանգին պատասխանեց մի կին, ասացի, որ նա իմ որդին։ Նա էլ ասաց, որ հեռախոսահամարի բաժանորդի վիճակը շատ ծանր է, նրան վիրահատում են։ Սկզբում չհավատացինք, սակայն անմիջապես գնացինք հիվանդանոց»,- ընթերցեց դատախազը։

Տուժողի հայրն իր ցուցմունքում նշել էր, որ որդու ընկերների խոսակցությունից իմացել է, թե Դավիթի վրա կրակել են Ալեքսանդր Սարգսյանի տան նկուղում. «Ենթադրեցի, որ նրա վրա կարող է կրակած լինի Սաշիկը: Դրանից հետո՝ մի քանի օր անց, երբ ես գնացի տուն, վերելակի մոտ հանդիպեցի Արթուր Ղևոնդյանին, ասացի, որ լսել եմ՝ Ալեքսանդր Սարգսյանն է կրակել, նա էլ ասաց, որ կրակել է նրա որդիներից մեկը՝ թմրամիջոցի ազդեցության տակ, նաև նշեց, որ այդ ամենը եղել է պատահական»։

Մանրամասները՝ տեսանյութում:

Լիլիթ Շաբոյան