10.10.2026 | 21:37
Կանանց Հայաստանի հավաքականը ոչ-ոքի խաղաց Ինդոնեզիայի հետ
ԱԺ-ն առաջին ընթերցմամբ ընդունեց «Պաշտպանության մասին» օրենքի նախագիծը
25.10.2017 | 13:50
Ազգային ժողովն այսօր ձայների 86 կողմ, 9 դեմ հարաբերակցությանբ առաջին ընթերցմամբ ընդունեց «Պաշտպանության մասին» օրենքի նախագիծը: Դեմ քվեարկողները ընդդիմադիր «Ելք» խմբակցության պատգամավորներն էին:
Խմբակցության ղեկավար Նիկոլ Փաշինյանը պարզաբանեց՝ ինչու են դեմ քվեարկելու. «Մենք դեմ ենք քվեարկելու օրենքին, որովհետեւ խնդիր ունենք այն փիլիսոփայության հետ, որը դրված է գլխավոր շտաբի ձևավորման և ընդհանրապես գործունեության հիմքում: Բացի այդ, բավարար չենք համարում ռազմարդյունաբերական համալիրի զարգացման տեմպերը»:
Փաշինյանը ընդգծեց դեմ քվեարկելու պատճառ է նաև այն, որ իրենց առաջարկը, որը պետք է նպաստեր ռազմարդյունաբերության զարգացմանը, չի ընդունվել:
Հիշեցնենք՝ ըստ հիմնավորման՝ օրենքի նախագծի ընդունումը պայմանավորված է ՀՀ Սահմանադրության փոփոխությունների հետ կապված գործող «Պաշտպանության մասին» ու «Զորահավաքային նախապատրաստության և զորահավաքի մասին» ՀՀ օրենքների վերանայման անհրաժեշտությամբ: Այդ շրջանակներում նպատակահարմար է գտնվել նշված օրենքները, ինչպես նաև «Պաշտպանության նպատակով տրանսպորտային միջոցների օգտագործման մասին» ՀՀ օրենքը միավորել և դրանցով կարգավորվող հարաբերությունները սահմանել մեկ օրենքի տեսքով:
Շողիկ Գալստյան
