15.10.2026 | 09:30
ՀՀ տարածքում ավտոճանապարհներն անցանելի են
Երևանում ընթանում է «Հոգեբանական սպասարկման հիմնախնդիրները բարձր նվաճումների սպորտում» միջազգային գիտաժողովը
25.10.2017 | 13:03
Երևանում ընթանում է «Հոգեբանական սպասարկման հիմնախնդիրները բարձր նվաճումների սպորտում» միջազգային գիտաժողովը, որին երեկ ներկա է գտնվել ՀՀ սպորտի և երիտասարդության հարցերի փոխնախարար, Ֆիզիկական կուլտուրայի հայկական պետական ինստիտուտի հոգաբարձուների խորհրդի նախագահ Արսեն Քարամյանը:
«Մենք մեր սպորտային բոլոր լավ ավանդույթները վերականգնելու խնդիր ունենք հոգեբանության բնագավառում: Սա առաջին փորձերից մեկն է, որը պրակտիկ մեծ նշանակություն ունի՝ աշխուժություն բերելու թե մենապայքարային, թե հատկապես խաղային մարզաձեւերում: Մենք շատ հաճախ տեսնում ենք, անհատ մարզիկներով համալրված թիմեր, որոնց հաջողությունները, հաղթանակները ուշանում են, ձգձգվում: Դա նաեւ մարզական հոգեբանության հետեւանք է»,- իր խոսքում նշեց Արսեն Քարամյանը:
Գիտաժողովին մասնակցում են ԱՊՀ և եվրոպական երկրների ներկայացուցիչներ, որոնց գիտական աշխատանքները նվիրված են ֆիզիկական դաստիարակության, սպորտային մարզումների, ադապտիվ և վերականգնող ֆիզիկական կուլտուրայի, առողջ կենսակերպի հոգեբանական խնդիրների լուսաբանմանը: Բացի գիտաժողովի աշխատանքներից մասնակցները, ֆիզիկական կուլտուրայի հայկական պետական ինստիտուտի մասնագետների և մարզիչների համար, հանդես կգան դասախոսություններով:
Նշենք, որ գիտաժողովը եռօրյա է և այն անցկացվում է ՀՀ սպորտի և երիտասարդության հարցերի փոխնախարար, Ֆիզիկական կուլտուրայի հայկական պետական ինստիտուտի հոգաբարձուների խորհրդի նախագահ Արսեն Քարամյանի նախաձեռնությամբ:
