Սահմանադրական կարգը բռնությամբ տապալելը հանցագործություն էր, թե՛ նախկինում, թե՛ հիմա․ դատախազ. ՏԵՍԱՆՅՈՒԹ

Մեղադրող դատախազ Գևորգ Բաղդասարյանն այսօր դատարանում անդրադառնալով Քոչարյանի և մյուսների նկատմամբ քրեական հետապնդումը դադարեցնելու մասին միջնորդություններին, ասաց, որ դրանք անհիմն են և ենթակա են մերժման։

Դատախազն անդրադառնալով պաշտպանության կողմի պնդմանը, թե մեղադրանքն ամբաստանյալների վիճակը վատթարացնող է, ասաց պետք չէ մոռանալ, որ օրենքի բարելավվող լինել-չլինելը պետք է դիտարկել տվյալ արարքը կատարած անձի շրջանակներում․ «Օրենքը կարող է տվյալ անձի համար լինել բարելավվող կամ չբարելավվող, տվյալ դեպքում Սահմանադրական կարգի տապալումը, որը հանցագործություն էր, թե՛ նախկինում, թե՛ հիմա չի կարող որպես լավացնող կամ վատթարացնող դիտարկվել»։

Դատախազը պնդեց՝ Սահմանադրական կարգը բռնությամբ տապալելը հանցագործություն էր, թե՛ նախկինում, թե՛ հիմա։ Նա ասաց, որ պաշտպանական կողմը մեղադրանքի խտրականության մասին խոսելիս ավելի շատ քաղաքականությունից խոսեց, քան իրավունքից։

Անդրադառնալով Քոչարյանի պաշտպաններից Արամ Վարդևանյանի խոսքերին, թե նախկինում «Յոթի» գործով դատախազները այլ բան են ասել, այս գործով դատախազները՝ մեկ այլ բան, Բաղդասարյանն արձագանքեց․ «Դատախազության համակարգը միասնական համակարգ է, բայց դա դեռ չի նշանակում, որ եթե որևէ դատախազ որևէ գործով կարծիք է հայտնում, ապա դա դատախազներին զրկում է իրավունքի նորմը սեփական տեսանկյունից ներկայացնել»։ Բաղդասարյանն ասաց, որ յուրաքանչյուր դատախազ ազատ է իրավունքի նորմը մեկնաբանել այնպես, ինչպես ճիշտ է գտնում, իսկ դրա իրավաչափությունը կարող է որոշել միայն վեճը լուծող անձը․ «Ասել, որ դատախազությունը միասնական կառույց է, դուք այլ բան եք ասում, այլ մարդիկ՝ այլ, և դրա տակ փորձել այլ բաներ գտնել, քան իրավական որոշակիությունն է, անթույլատրելի է»։

Մանրամասները՝ տեսանյութում։

Լիլիթ Շաբոյան