Քաղաքականություն
08.02.2020 | 17:47
Ադրբեջանի Հանրապետությունում լռության օր է, փետրվարի 9-ին այնտեղ կայանալու են արտահերթ խորհրդարանական ընտրություններ: Ադրբեջանի Կենտրոնական ընտրական հանձնաժողովի նախագահը հայտարարել է, որ Միլի Մեջլիսում առկա 125 տեղի համար պայքարելու է 1321 թեկնածու, այսինքն` յուրաքանչյուր պատգամավորական մանդատի համար պայքարելու է մոտ 11 հոգի:
Միլի Մեջլիսն ընդունել էր խորհրդարանը լուծարելու և արտահերթ ընտրություններ անցկացնելու վերաբերյալ Ադրբեջանի նախագահին ուղղված դիմումը, վերջինս էլ խորհրդարանը լուծարելու վերաբերյալ հարցումն ուղարկել էր Սահմանադրական դատարան: Դեկտեմբերի 4-ին ՍԴ-ն հաստատել էր, որ Միլլի Մեջլիսի լուծարման մասին որոշումը համապատասխանում է Ադրբեջանի սահմանադրությանը, ինչից հետո, նախագահ Ալիևը խորհրդարանի արձակման և արտահերթ ընտրությունների անցկացման վերաբերյալ հրամանագիր էր ստորագրել։ Արտահերթ խորհրդարանական ընտրությունները նշանակվել են 2020թ. փետրվարի 9-ին, այն դեպքում, երբ Ադրբեջանում հերթական խորհրդական ընտրությունների անցկացումը նախանշված էր 2020թ. նոյեմբերին:
Արտահերթ խորհրդարանական ընտրություններն Ադրբեջանում կմեկնարկեն փետրվարի 9-ին, ժամը 08:00-ին: Նոր խորհրդարանը կընտրվի 5 տարի ժամկետով:
