«Ծառուկյան» դաշինքն ահնրաժեշտության դեպքում դրոշակներով փողոց դուրս կգա՞

ԱԺ «Ծառուկյան» խմբակցությունը դեռևս չի որոշել, թե ինչպես է քվեարկելու վարչապետ Կարեն Կարապետյանի՝ կառավարության կողմից ներկայացրած 2018 թվականի բյուջեի ծրագրին: Այս մասին խորհրդարանում լրագրողների հետ զրույցում ասաց ԱԺ «Ծառուկյան» խմբակցության պատգամավոր Վարդևան Գրիգորյանը:

Լրագրողների հստակեցնող հարցին՝ հակված են կո՞ղմ, թե՞ դեմ քվեարկել, պատգամավորը պատասխանեց. «Ո՞նց կարող ենք ավելի հակված լինել կողմ քվեարկել, երբ երկրում նման սոցիալական վիճակ է, երբ բյուջեով նախատեսված չէ սոցիալական իրավիճակի որևէ փոփոխություն: Բացի այդ, ժողովրդի վիճակն այս բյուջեով չի բարելավվի: Իմ անձնական կարծիքն է, երբ խմբակցությունը քննարկի հարցը, որոշման գանք, այդ մասին կիրազեկենք»:

Պարոն Գրիգորյանը պնդում է, որ Գագիկ Ծառուկյանի կողմից հրահանգ չի եղել բյուջեի նախագծին դեմ արտահայտվել: «Պարոն Ծառուկյանը միշտ քննարկման կողմնակից է»,- շարունակեց պատգամավորը:

Ինչ վերաբերում է «Ծառուկյան» դաշինքի՝ ընդդիմադիր լինելու հանգամանքին, Վարդևան Գրիգորյանը պնդեց՝ իրենք գործում են ընդդիմադիր դաշտում:

Factor.am-ի հարցից՝ ինչպես է արտահայտվում իրենց ընդդիմադիր լինելը՝ բացի ԱԺ-ում որոշ օրինագծերին դեմ քվեարկելուց, խմբակցության պատգամավորը վրդովվեց. «Ի՞նչ անենք, դրոշակ վերցնենք փողոց դուրս գա՞նք»:

Երբ հիշեցրինք պարոն Գրիգորյանին,որ նախկինում այդպես վարվել են, ի՞նչն է խանգարում հիմա ևս նման քայլեր անել, իրեն ընդդիմադիր հռչակած քաղաքական ուժի ներկայացուցիչը վստահեցրեց՝ անհրաժեշտության դեպքում նորից նույնը կանեն:

Մանրամասները՝ տեսանյութում:

Շողիկ Գալստյան