Ժնևյան հանդիպումից ունեցել ենք էական դրական ձեռքբերումներ. Կորյուն Նահապետյան

Չնայած Ժնևյան հանդիպումից ընդամենը երեք օր անց հայկական կողմը սահմանին զոհ ունեցավ, իսկ այսօր էլ հայտնի դարձավ՝ հակառակորդը շփման գծում կիրառել է հրետանային զինատեսակներ, այդուհանդերձ ԱԺ Պաշտպանության և անվտանգության հարցերի մշտական հանձնաժողովի նախագահ Կորյուն Նահապետյանը պնդում է՝ հայկական կողմը Ժնևյան հանդիպումից էական դրական ձեռքբերումներ է ունեցել:

«Ձեռքբերումն այն է, որ կողմերը համաձայնության են եկել լարվածության թուլացման շուրջ»,- հիմնավորեց պարոն Նահապետյանը:

Մեր դիտարկմանը՝ այդ համաձայնության հետո, սակայն, զոհ ունեցանք, Նահապետյանն ասաց՝ ցավով են ընդունում այդ փաստը, բայց պետք է շարունակել բանակցել՝ հակառակորդին պարտադրելով գիտակցել՝ խնդիրը պետք է կարգավորվի միայն խաղաղ ճանապարհով:

Factor.am-ի հարցին՝ նախագահ Սերժ Սարգսյանը Ժնևում տեղի ունեցած հանդիպումից հետո հայտարարեց՝ Ադրբեջանի նախագահը ևս խորապես շահագրգռված է, որ սահմանին զոհեր չլինեն, ստացվում է՝ Սերժ Սարգսյանի համոզմունքը օբյեկտիվ հիմքեր չուներ, Պաշտպանության և անվտանգության հարցերի մշտական հանձնաժողովի նախագահը հակադարձեց՝ դեռ վաղ է նման պնդումներ անել. «Առաջիկա զարգացումները ցույց կտան, դա արդյոք մարտավարական հնա՞րք էր ադրբեջանական իշխանության կողմից, թե՞ գործողություն էր, որը ենթադրաբար դուրս է եկել Ադրբեջանի քաղաքական ղեկավարության վերահսկողությունից»:

Հիշեցնենք՝ Ադրբեջանի զինված ուժերը հակամարտ զորքերի շփման գծի հյուսիսարևելյան ուղղությամբ կիրառել են հրետանային զինատեսակներ՝ հայկական դիրքերի վրա արձակելով ականանետի 5 արկ և «ՍՊԱՅԿ» տիպի մեկ հակատանկային հրթիռ:

Մանամասները՝ տեսանյութում:

Շողիկ Գալստյան